Komisionerja e Bashkimit Evropian për Zgjerimin, Marta Kos, ka reaguar pas vendimit të Dhomave të Specializuara të Kosovës në Hagë, që shpalli fajtorë katër ish-krerët e UÇK-së, Hashim Thaçin, Kadri Veselin, Jakup Krasniqin dhe Rexhep Selimin.
Përmes një reagimi në rrjetin social X, Kos theksoi se Dhomat e Specializuara të Kosovës janë një institucion i pavarur i drejtësisë dhe se vendimet e tij duhet të respektohen.
“Vendimet e saj duhet të respektohen dhe të dënuarit kanë të drejtë apelimi”, shkroi komisionerja evropiane.
Në vijim të reagimit të saj, Marta Kos bëri thirrje për shmangien e tensioneve dhe për një proces pajtimi në rajon, duke e lidhur këtë me perspektivën evropiane të vendeve të Ballkanit Perëndimor.
“U bëj thirrje të gjithë aktorëve në rajon që të ndihmojnë në shërimin e plagëve të së kaluarës. Vetëm përmes pajtimit, shtetet e rajonit mund të tejkalojnë ndasitë dhe të bëjnë hapa përpara drejt një të ardhmeje të përbashkët në BE”, u shpreh ajo.
Deklarata e Kos vjen pas shpalljes së aktgjykimit ndaj katër ish-drejtuesve të UÇK-së, të cilët tashmë kanë të drejtën e apelimit ndaj vendimit të shkallës së parë.