Britania e Madhe ka reaguar pas vendimit të Dhomave të Specializuara të Kosovës në Hagë ndaj ish-krerëve të Ushtrisë Çlirimtare të Kosovës, duke ritheksuar mbështetjen e saj për Kosovën dhe institucionet e saj.
Ministri britanik për Evropën, Lord Wood of Anfield, deklaroi se Londra respekton pavarësinë e Dhomave të Specializuara të Kosovës dhe procesin e tyre gjyqësor, ndërsa nënvizoi angazhimin britanik për drejtësinë, përgjegjësinë dhe pajtimin në rajon.
“Britania e Madhe mbetet një vend mik dhe partner i afërt i Kosovës, duke mbështetur fuqishëm sovranitetin, pavarësinë dhe integritetin territorial të saj, si dhe paqen në Ballkanin Perëndimor”, tha Wood.
Duke iu referuar ndërhyrjes së NATO-s në vitin 1999, ministri britanik tha se vendi i tij është krenar për rolin që luajti së bashku me aleatët e NATO-s në përballimin e krizës në Kosovë.
“Jemi krenarë për rolin që luajtëm së bashku me aleatët tanë të NATO-s në vitin 1999, duke ndihmuar në parandalimin e një katastrofe humanitare, si dhe për mbështetjen e pavarësisë së Kosovës në vitin 2008”, u shpreh ai.
Sa i përket aktgjykimit të Dhomave të Specializuara, Wood e cilësoi atë si “një moment të rëndësishëm”, por theksoi se vendimi lidhet me përgjegjësinë individuale dhe nuk përbën një gjykim mbi shtetësinë apo sovranitetin e Kosovës.
“Ky nuk është një gjykim mbi shtetësinë, sovranitetin apo të drejtën e Kosovës për të përcaktuar të ardhmen e saj”, tha ministri britanik, duke shtuar se qeveria britanike shpreh ngushëllimet për viktimat dhe familjet e tyre.
Wood theksoi gjithashtu se gjetjet e gjykatës lidhen me individë dhe nuk duhet të shfrytëzohen për të nxitur tensione ndërmjet komuniteteve apo në rajon.
“Udhëheqësit politikë dhe figurat publike kanë përgjegjësi të promovojnë qetësinë, të sigurojnë që çdo reagim të mbetet paqësor dhe të vendosin sigurinë e njerëzve në radhë të parë”, deklaroi ai.
Në përfundim, ministri britanik tha se Mbretëria e Bashkuar do të vijojë bashkëpunimin me partnerët në Ballkanin Perëndimor dhe më gjerë, me synim mbështetjen e paqes, drejtësisë dhe një të ardhmeje të sigurt e të begatë për të gjitha komunitetet.