"Ne e dimë historinë"/ Djali i Hashim Thaçit: Ashtu si babi sot, do të vazhdojmë përpara me kokën lart

Djali i Hashim Thaçit, Endrit Thaçi ka bërë një reagim në rrjetet sociale pas dënimit të ish-krerëve të UÇK-së.

Në reagimin e bërë, Endrit Thaçi falënderon të gjithë ata që udhëtuan drejt Hagës dhe pritën vendimin.

Thaçi shprehet se beteja nuk ka mbaruar dhe do të vazhdojnë përpara me dinjitet.

Endrit Thaçi shkruan se historinë e Kosovës nuk mund ta ndryshojë asnjë vendim, ushtarët e kanë gdhendur në lëkurë.

Reagimi i Endrit Thaçit

Falënderoj të gjithë vëllezërit dhe motrat shqiptare që udhëtuan dhe që pritën me orë të tëra për vendimin. Në veçanti, ata që nuk e ndalën zërin edhe pas vendimit.

Mirënjohja ime shkon për secilin prej jush që na u bëtë krah ndër vite, në këtë rrugëtim të padrejtë të Babit dhe shokëve të tij.

Sapo të kthehem, do t’i bashkëngjitem edhe unë zërit tuaj, sepse kjo betejë nuk ka mbaruar. Ashtu si Babi sot, që me kokën lart u përball me këtë ditë, edhe ne do të vazhdojmë përpara me kokën lart, me dinjitet dhe maturi.

Ne e dimë historinë tonë. Ushtarët tanë e kanë të gdhendur në lëkurë, ndërsa dëshmorët tanë e kanë vulosur me gjakun e tyre. Këtë histori nuk mund ta ndryshojë asnjë vendim.