“Thaçit nuk ia priste mendja që do përfundonte në Hagë”, Gjoni, PS-LSI debat për Gjykatën Speciale

Ish-deputeti Ralf Gjoni ka komentuar në emisionin “Now” në Euronews Albania vendimin e Gjykatës Speciale në Hagë për ish-krerët e Ushtrisë Çlirimtare të Kosovës, duke u ndalur edhe te debatet politike në Tiranë në kohën kur u diskutua krijimi i kësaj gjykate.

Gjoni tha se në atë periudhë në Shqipëri ishte në pushtet koalicioni PS-LSI dhe se brenda qeverisë kishte pasur diskutime të forta lidhur me qëndrimin që duhej mbajtur ndaj Kosovës.

Ai tregoi se në atë kohë përfaqësues amerikanë dhe europianë i kishin kërkuar Tiranës të mos ushtronte presion ndaj Kosovës për çështjen e krijimit të Gjykatës Speciale.

“Kam qenë në detyrë si këshilltar diplomatik i Kuvendit në atë kohë. Amerikanët dhe europianët na kërkuan ne në Tiranë të mbyllnim gojën dhe të mos bënim presion ndaj Kosovës që të miratonte ngritjen e kësaj gjykate. Ne kemi pasur debate shumë të forta brenda koalicionit për skenarin se çfarë do të përbënte ngritja e kësaj gjykate. Ideja që do të gjykoheshin liderët e UÇK-së, që po mbronin tokën e vet, ishte e pamimagjinueshme”, u shpreh ai.

Gjoni e krahasoi situatën me përfshirjen e trupave amerikane në luftërat në Afganistan dhe Irak, duke argumentuar se Shtetet e Bashkuara nuk pranojnë që ushtarët e tyre të përballen me procese të tilla gjyqësore ndërkombëtare.

“Thaçit nuk ia priste mendja se do të arrinte këtu, por kjo është një njollë edhe për SHBA, sepse ne e dimë shumë mirë përfshirjen e NATO-s”, deklaroi Gjoni.