Protestuesit janë mbledhur mbrëmjen e sotme pranë Bllokut të Sigurisë në rrugën “Mine Peza”, ku ndodhen qytetar&e...
SPORT
Katër ndeshje në 10 ditë/ Kosova përballet me disa mungesa para grumbullimit
PiranjatPërditësimi i fundit 17 Shtator 2026, 08:30
Kosova do ta nisë ciklin e saj në Ligën B të Ligës së Kombeve më 24 shtator ndaj Irlandës në Prishtinë, ndërsa më pas e pret një kalendar i ngjeshur me katër ndeshje brenda dhjetë ditësh.
“Dardanët” do të udhëtojnë drejt Austrisë për duelin e 27 shtatorit, ndërsa më 1 tetor do të përballen me Izraelin në Hungari. Cikli do të mbyllet më 4 tetor në Prishtinë, sërish ndaj Austrisë.
Përzgjedhësi Franco Foda pritet të ketë disa probleme me formacionin, pasi disa lojtarë të rëndësishëm mund të mungojnë për shkak të dëmtimeve ose mungesës së minutave te klubet e tyre.
Amir Rrahmani nuk pritet të jetë pjesë e grumbullimit, pasi ka pezulluar angazhimin me përfaqësuesen pas mosmarrëveshjeve me Federatën e Futbollit të Kosovës.
Në mbrojtje mungesë e mundshme është edhe Kreshnik Hajrizi. Mbrojtësi, i cili u dëmtua në maj dhe iu nënshtrua ndërhyrjes kirurgjikale, ende nuk është rikuperuar plotësisht dhe pritet të mungojë në katër ndeshjet e radhës.
Probleme fizike ka edhe Elvis Rexhbeçaj. Mesfushori pësoi dëmtim gjatë një stërvitjeje me Wolfsburgun disa muaj më parë dhe ende nuk është rikthyer plotësisht në dispozicion.
Në dyshim mbetet Florent Muslija, i cili nuk ka luajtur që prej 24 prillit, kur pësoi dëmtim në gju. Mesfushori vijon procesin e rikuperimit dhe gjendja e tij do të përcaktojë nëse do të jetë në dispozicion të Fodës.
Edhe Fisnik Asllani mbetet një pikëpyetje. Sulmuesi është rikthyer së fundmi nga dëmtimi në gju dhe luajti disa minuta për Hoffenheimin ndaj Stuttgartit, por ende nuk dihet nëse është në gjendjen optimale për të përballuar ngarkesën e katër ndeshjeve.
Një situatë tjetër është ajo e Milot Rashicës, i cili ka pasur pak minuta këtë sezon te Besiktasi. Mungesa e hapësirës në klub mund të ndikojë edhe në përfshirjen e tij në listën e Kosovës.
Me katër ndeshje në vetëm dhjetë ditë, gjendja fizike e lojtarëve do të jetë një prej faktorëve kryesorë për përzgjedhjen e skuadrës. Lista e Franco Fodës pritet të publikohet të premten.
