Dënimi i ish-krerëve të UÇK-së/ PD-mazhorancës: Të dalim me qëndrim të përbashkët

Në mbledhjen e sotme të Konferencës së Kryetarëve është folur edhe lidhur me dënimin e ish-krerëve të UÇK-së me 81 vjet burg.

Kreu i Grupit Parlamentar të PD-së, Gazment Bardhi, është shprehur se opozita dhe mazhoranca duhet të dalin me një qëndrim të përbashkët për këtë çështje që, sipas tij, nuk duhet të bëhet politike.

“Ka pasur një diskutim në Komisionin e Jashtëm për një qëndrim të përbashkët, për një draft-deklaratë të përbashkët.

Për çështjet e brendshme kemi shumë ndasi, por nuk ka asnjë arsye të kemi ndasi për çështjen e Kosovës. Unë propozoj ta diskutojmë këtu këtë qëndrim dhe ju, zoti kryetar i Kuvendit, në emër të Kuvendit, të mbani një qëndrim zyrtar dhe të përbashkët.

Nuk ka pasur një qëndrim zyrtar të qeverisë, nuk ka pasur një qëndrim zyrtar të Ministrisë së Jashtme. Këtë nuk e di pse! Por kjo nuk na pengon që ne të kemi një qëndrim të përbashkët të të gjitha forcave politike për çështjen e Kosovës. Kosova nuk ka nevojë që ne të bëjmë politike”, është shprehur Bardhi. /CNA