Milani pësoi një humbje të papritur në “San Siro”, duke u mposhtur 0-2 nga Benfika në raundin e parë të Ligës së Europës.

Të dyja skuadrat bënë ndryshime të shumta në formacion, por fakti që Benfika zbriti në fushë me disa prej rezervave e bën rezultatin edhe më zhgënjyes për kuqezinjtë.

Pas ndeshjes, trajneri Ruben Amorim pranoi se skuadra e tij ka shumë probleme për të korrigjuar.

“Ka shumë vend për përmirësim. Kemi shumë punë për të bërë”, deklaroi portugezi në konferencën për shtyp.

Amorim theksoi se Milani po krijon probleme për veten kur ka topin dhe nuk po arrin të prodhojë mjaftueshëm raste.

Një tjetër shqetësim për trajnerin është reagimi i skuadrës pas pësimit të golit të parë.

“Sapo pësojmë gol, e humbasim identitetin dhe çorganizohemi”, u shpreh ai.

Sipas Amorimit, Milani duhet të ruajë qetësinë dhe strukturën taktike edhe kur ndodhet në disavantazh.

Ai pranoi gjithashtu se Benfika ishte më e organizuar dhe më e qartë në atë që kërkonte nga loja.

“Do të thoja se Benfika ishte skuadra më e mirë”, tha trajneri i Milanit.

I pyetur për paraqitjen e skuadrës, Amorim u shpreh: “Ndoshta po të kisha fituar do të përgjigjesha, por tani nuk jam në gjendjen e duhur mendore për ta bërë këtë”.

Trajneri portugez pranoi se është i shqetësuar dhe se presioni te një klub si Milani është i vazhdueshëm.

Megjithatë, ai theksoi se sezoni është ende në fillim dhe se skuadra duhet të reagojë menjëherë në ndeshjen e ardhshme.