Ndalimi i telefonave/ GJKKO i përgjigjet Dhomës së Avokatisë: Nuk është shkak për bojkotin e seancave

Gjykata e Posaçme i është përgjigjur Dhomës së Avokatisë në lidhje me kërkesën “Për rishikimin e dispozitave të përcaktuara në Rregulloren e Brendshme për sigurinë, rendin, solemnitetin dhe rregullat e sjelljes në ambientet e GJKKO-së”, në veçanti me mbajtjen dhe përdorimin e telefonave në sallën e gjyqit.

GJKKO shprehet në përgjigjen zyrtare se siguria e sallës së gjykimit dhe solemniteti i procesit nuk janë vetëm çështje protokolli, por janë të domosdoshme për administrimin e drejtësisë në mënyrë të sigurt dhe të rregullt.

Po ashtu bëhet me dije se ndalimi i mbajtjes së telefonit në sallë gjyqi, shtrihet mbi të gjitha palët e pranishme, gjyqtarin, prokurorin, mediat dhe publikun.

Ndër të tjera thuhet se moslejimi i telefonit në sallën e gjyqit nuk e lë palën mbrojtëse pa mjetet e nevojshme për ushtrimin e funksionit të tij procedural. Sipas GJKKO-së, telefoni nuk është vetëm mjet komunikimi, por është një pajisje që funksionin edhe si aparat fotografik dhe si regjistrues audioje dhe njëkohësisht për të shpërndarë informacionin në kohë reale.

E njëjta praktikë, sipas GJKKO-së, ndiqet edhe nga Gjykata e Drejtësisë e BE-së, Gjykata Penale Ndërkombëtare në Hagë dhe po ashtu nga disa sisteme gjyqësore në SHBA dhe disa shtete në Europë.

Si përfundim, GJKKO-ja çmon se ndalimi i mbajtjes dhe përdorimit të telefonave celularë në sallën e gjykimit përbën masë të ligjshme, të nevojshme dhe proporcionale.

Gjithashtu bëhet me dije se Rregullorja ka hyrë në fuqi më 1 shtator dhe si rrjedhojë është e detyrueshme të zbatohet nga të gjithë pjesëmarrësit në procesin gjyqësor. GJKKO sqaron se kontestimi i kësaj Rregullorje nga Dhoma e Avokatisë nuk pezullon efektin juridik të saj dhe nuk mund të shërbejë si shkak për bojkotim të seancave. /CNA

Dokumenta bashkëngjitur