Debatet PS-PD për vendimin e Hagës/ Ish-deputeti: Eufori për të gjetur tradhtarin, të shihen zgjidhjet

Ish-deputeti Edmond Spaho komentoi sot debatet e prodhuara nga opozita gjatë seancës së sotme në Kuvend lidhur me fajtorët e dënimit të katër ish-krerëve të UÇK-së nga Gjykata e Hagës.

Përmes një postimi në rrjetet e tij sociale, Spaho shprehet se edhe në çështje të tilla që bashkojnë shqiptarët, as të majtët e të djathtët nuk bëhen bashkë.

Sipas Spahos, në vend të këtyre debateve, do të ishte mirë që spektri politik shqiptar në Kosovë, Shqipëri, Mal të Zi dhe Maqedoninë e Veriut të mblidhej, të diskutonte dhe të hartonte një strategji se si do të shkohet dhe si do të organizohet mbrojtja e 4 të dënuarve në Gjykatën e Apelit të Tribunalit të Hagës.

 “Opozita në Shqipëri ka debatuar sot në Parlament se kush e ka fajin që u ngrit Tribunali i Hagës, i cili dje dënoi 4 ish-drejtues të UÇK-së.

Jo më kot ka dalë shprehja që më parë bën bashkë një tufë me pleshta se bën bashkë shqiptarët, aq më shumë pozitën me opozitën e çdo vendi ku ne banojmë.

Drejtuesit e shqiptarëve, të majtë e të djathtë, nuk bëhen bashkë për zgjidhjen e një çështjeje kombëtare, por shikojnë si të përfitojnë politikisht brenda vendit, si t'ia hedhin fajin tjetrit dhe si të zbulojnë "tradhtarë". Madje e bëjnë me mburrje dhe me eufori boshe prej mendjelehti.

Është fakt i ditur botërisht që ngritja e Tribunalit të Hagës ishte kërkesë pa ekuivok ndërkombëtare e mbështetur nga amerikanët.

Nëse Kosova nuk do ta votonte ngritjen e Tribunalit në Parlamentin e saj, OKB-ja, me propozimin e Rusisë, do të ngrinte një tribunal ndërkombëtar për Kosovën dhe amerikanët do ta votonin atë, duke e vënë Kosovën politikisht në një situatë edhe më të vështirë.

Sot dalin shumë trima që mburren se kanë thënë të mos votohej krijimi i Tribunalit të Hagës, por nuk thonë se si do ta pengonin krijimin e tribunalit ndërkombëtar të OKB-së.

Të njëjtën logjikë ka propozimi idiot që Parlamenti i Kosovës të zhbëjë Tribunalin e Hagës, duke harruar që komuniteti ndërkombëtar dhe armiqtë e shqiptarëve kanë mjete të tjera në dispozicion për t'ia vënë Kosovës dy këmbët në një këpucë.

Ky qëndrim në Parlament sot është ekzaktësisht të flasësh si e ëma e Zeqos në majë të thanës ose kur nuk ke punë, tund derën.

Do të ishte mirë që spektri politik shqiptar në Kosovë, Shqipëri, Mal të Zi dhe Maqedoninë e Veriut të mblidhej, të diskutonte dhe të hartonte një strategji se si do të shkohet dhe si do të organizohet mbrojtja e 4 të dënuarve në Gjykatën e Apelit të Tribunalit të Hagës.

Por kjo nuk bëhet, sepse secili shikon ngushtësisht interesin e grupimit të tij politik, mendon se si ta përdorë këtë çështje për të fituar pikë brenda vendit për zgjedhjet e ardhshme.

Aq më tepër që ne shqiptarët kemi shprehjen që çudia më e madhe 3 ditë zgjat, më pas do të dalë një çështje tjetër dhe do të merremi me të siç trajtojmë me papërgjegjshmëri çdo gjë.

Diskutimi i hapur sot tregon jo vetëm papjekurinë e klasës politike shqiptare dhe atyre që ngrenë çështje të tilla, por edhe një herë evidenton faktin që për ne ka më shumë rëndësi t'i hamë kokën njëri-tjetrit brenda vendit, sesa të kujdesemi për çështje që kanë të bëjnë me tërë shqiptarët.

Në të vërtetë, qytetarët shqiptarë as u vënë veshin broçkullave të tilla, pasi e dinë se përse bëhen dhe se ato nuk kanë asnjë vlerë për jetën e tyre”,-shkruan Spaho./CNA