Nga Alba Kepi

Një premtim i vjetër i së djathtës italiane rikthehet në skenë, këtë herë nga qeveria e Giorgia Melonit.

Në vitin 2008, Silvio Berlusconi premtonte heqjen progresive të taksës vjetore të automjetit; 18 vjet më vonë, qeveria Meloni ndërmerr hapin e parë konkret. Nga viti 2027, makinat deri në 80 KW dhe të gjitha motoçikletat parashikohet të përjashtohen nga pagesa. Masa prek rreth 14.5 milionë mjete dhe kushton mbi 2.3 miliardë euro. Vendimi vjen në prag të zgjedhjeve parlamentare të vitit 2027, duke i dhënë atij jo vetëm një dimension fiskal, por edhe një peshë të fortë politike.

Miliona italianë mund të nisin vitin 2027 me një pagesë më pak. Qeveria e Giorgia Melonit ka vendosur të heqë taksën vjetore të automjetit për makinat deri në 80 kW dhe për të gjitha motoçikletat. Masa prek rreth 14.5 milionë mjete dhe kushton mbi 2.3 miliardë euro. Zyrtarisht, qeveria e paraqet si një ulje të barrës fiskale që synohet të bëhet e përhershme. Por fakti që përfitimi hyn në fuqi pikërisht në vitin e zgjedhjeve parlamentare e vendos vendimin edhe në qendër të debatit politik: reformë fiskale apo masë me peshë elektorale?

Qeveria italiane ka miratuar një ndërhyrje që prek drejtpërdrejt një prej pagesave vjetore të miliona familjeve. Nga viti 2027, makinat me fuqi deri në 80 kW dhe të gjitha motoçikletat do të përjashtohen nga taksa vjetore e automjetit, sipas kushteve të përcaktuara në masën e re.

Sipas përllogaritjeve të qeverisë, përfituesit do të jenë rreth 14.5 milionë automjete, prej të cilave më shumë se 13.2 milionë janë makina. Në total, masa prek rreth 70 për qind të mjeteve në qarkullim.

Kursimi ndryshon sipas fuqisë së automjetit, klasës mjedisore dhe tarifave rajonale. Për një makinë të re Euro 6 me fuqi 50 kW, taksa sipas tarifës bazë është rreth 129 euro në vit. Për automjetet më të vjetra, pagesa mund të jetë më e lartë. Sipas përllogaritjeve të qeverisë, kursimi mesatar do të jetë pak më i ulët se 165 euro, ndërsa në disa raste mund të arrijë deri në 240 euro në vit.

Taksa vjetore e automjetit është një taksë rajonale, ndaj të ardhurat nga ajo u përkasin rajoneve. Për këtë arsye, shteti ka parashikuar rreth 2.362 miliardë euro për të kompensuar rajonet për të ardhurat që do të mungojnë. Financimi vjen kryesisht nga kursimet e lidhura me PNRR-në.

Për qytetarët që kanë më shumë se një automjet, përjashtimi nuk do të jetë i shumëfishtë. Nëse një person ka dy makina, përfitimi do të aplikohet për atë me fuqinë më të ulët. Në rast të fuqisë së njëjtë, merret parasysh automjeti me taksën më të ulët. I njëjti parim zbatohet edhe për dy motoçikleta. Nëse një person ka një makinë dhe një motoçikletë, përjashtimi nuk mund të përdoret për të dyja.

Masa parashikohet të përfshijë edhe automjetet në leasing ose në kontrata qiraje afatgjatë dhe afatmesme, kur detyrimi për pagesën e taksës i takon përdoruesit.

Në mesin e modeleve që mund të përfshihen janë shumë makina të vogla dhe kompakte, si Fiat Panda, Fiat 500, Kia Picanto, Hyundai i10, Toyota Aygo, Ford Fiesta dhe Renault Clio. Në varësi të motorit dhe versionit, mund të përfshihen edhe disa modele SUV të vegjël, si Fiat 600, Jeep Avenger dhe Peugeot 2008, si dhe disa modele hibride.

Për makinat hibride, vendimtare është fuqia e përcaktuar në dokumentacionin e automjetit dhe jo thjesht fuqia e kombinuar e motorit termik dhe atij elektrik. Edhe automjetet elektrike kanë një regjim të veçantë fiskal dhe në shumë raste janë të përjashtuara nga pagesa gjatë pesë viteve të para.

Vendimi ka edhe një peshë të dukshme politike. Masa hyn në fuqi në vitin 2027, pikërisht kur Italia pritet të shkojë në zgjedhjet e ardhshme parlamentare. Qeveria e Melonit e paraqet si pjesë të politikës së saj për uljen e taksave dhe ka deklaruar se synon që përjashtimi të bëhet strukturor.

Nga ana tjetër, koha e zbatimit dhe numri i madh i përfituesve kanë hapur debat mbi efektin elektoral të masës. Heqja e një pagese vjetore është një ndërhyrje e drejtpërdrejtë dhe e lehtë për t’u kuptuar nga qytetarët, çka e bën atë edhe një instrument të fuqishëm komunikimi politik.

Heqja e taksës vjetore të automjetit nuk është një ide e re në politikën italiane. Që në vitin 2008, Silvio Berlusconi kishte premtuar heqjen progresive të saj, por nisma nuk u realizua për mungesë të burimeve financiare.

Tani qeveria Meloni ka zgjedhur ta nisë ndërhyrjen me makinat deri në 80 kW dhe me motoçikletat. Për momentin, masa vlen për vitin 2027. Nëse do të shndërrohet në një përjashtim të përhershëm, kjo do të përcaktohet nga hapat e ardhshëm të qeverisë dhe financimi i saj në vitet pasuese.