Pas shpalljes së aktgjykimit të shkallës së parë nga Dhomat e Specializuara në Hagë, me të cilin ish-krerët e Ushtrisë Çlirimtare të Kosovës u dënuan me gjithsej 81 vite burgim, mbështetja për ta është shprehur edhe jashtë Kosovës.
Shqiptarë të diasporës janë mbledhur në Times Square, në zemër të Nju Jorkut, në një protestë në mbështetje të ish-krerëve të UÇK-së.
Pjesëmarrësit shprehën kundërshtimin e tyre ndaj aktgjykimit dhe theksuan rëndësinë që, sipas tyre, ka ruajtja e kujtesës për luftën e Kosovës dhe sakrificën e popullit.
Po ashtu në Prishtinë, shpallja e aktgjykimit u shoqërua me tubime dhe protesta. Mijëra qytetarë u mblodhën në sheshin “Skënderbeu” për të ndjekur drejtpërdrejt vendimin, ndërsa pas shpalljes së dënimeve pati protesta para EULEX-it dhe ndërtesës së Qeverisë së Kosovës. Në disa momente protestuesit hodhën gurë drejt godinave dhe pati përplasje me policinë.
