Ngërçi me pagat e magjistratëve/ Shoqata Evropiane e Gjyqtarëve: Të respektohet vendimi i Kushtetueses

Bordi i Shoqatës Evropiane të Gjyqtarëve (EAJ) ka shprehur shqetësimin lidhur me zhvillimet në Shqipëri në lidhje me pagat e magjistratëve.

Sipas EAJ, Gjykata Kushtetuese, në vendimin e saj nr. 15/2026, e deklaroi sistemin ekzistues të pagave për gjyqtarët, prokurorët dhe personelin tjetër gjyqësor antikushtetues dhe urdhëroi ligjvënësin që të ndryshojë dispozitat përkatëse në përputhje me udhëzimet e saj brenda një afati të përcaktuar.

Bordi i Shoqatës Evropiane të Gjyqtarëve, në reagimin e tij thekson se, këto udhëzime u shpërfillën dhe u refuzua pagesa e shumës së përcaktuar nga gjykata

Po ashtu ka reaguar në lidhje dhe me projekligjin e miratuar në Komisionin e Ligjeve që pritet të votohet në parlament.

Bordi i Shoqatës Evropiane të Gjyqtarëve nënvizon se nëse ky projektligj do të miratohej, ai jo vetëm që do të shfuqizonte rregullimin që rezultoi drejtpërdrejt nga vendimi i Gjykatës Kushtetuese, por gjithashtu do të vendoste në mënyrë prapavepruese një metodë llogaritjeje që duket po aq problematike sa ajo që gjykata e konstatoi antikushtetuese. Sipas Bordit të Shoqatës Evropiane të Gjyqtarëve ligjvënësi po përpiqet të anashkalojë zbatimin e vendimit të Gjykatës Kushtetuese.

Në reagim theksohet se mosrespektimi i një vendimi të Gjykatës Kushtetuese është i barasvlefshëm me shkeljen e vetë Kushtetutës.

“Shoqata Evropiane e Gjyqtarëve. Grupi Rajonal i Shoqatës Ndërkombëtare të Gjyqtarëve.

Bordi i Shoqatës Evropiane të Gjyqtarëve (EAJ) shpreh shqetësimin e tij të thellë lidhur me zhvillimet në Shqipëri. Gjykata Kushtetuese, në Vendimin e saj nr. 15/2026, e deklaroi sistemin ekzistues të pagave për gjyqtarët, prokurorët dhe personelin tjetër gjyqësor antikushtetues dhe urdhëroi ligjvënësin që të ndryshojë dispozitat përkatëse në përputhje me udhëzimet e saj brenda një afati të përcaktuar. Ajo gjithashtu përcakton se cilat dispozita do të zbatohen në rast se ligjvënësi nuk vepron. Jo vetëm që këto udhëzime u shpërfillën dhe u refuzua pagesa e shumës së përcaktuar nga gjykata, por në Parlament madje u paraqit një projektligj që parashikonte një rillogaritje me efekt prapaveprues të shpërblimit në fjalë.

Nëse ky projektligj do të miratohej, ai jo vetëm që do të shfuqizonte rregullimin që rezultoi drejtpërdrejt nga vendimi i Gjykatës Kushtetuese, por gjithashtu do të vendoste në mënyrë prapavepruese një metodë llogaritjeje që duket po aq problematike sa ajo që gjykata e konstatoi antikushtetuese. Me pak fjalë, ligjvënësi po përpiqet të anashkalojë zbatimin e vendimit të Gjykatës Kushtetuese.

Zbatimi efektiv i vendimeve gjyqësore, i cili buron nga natyra e tyre detyruese, është një element themelor i shtetit të së drejtës. Vetë koncepti i një gjykate të pavarur, i përcaktuar në nenin 6 të Konventës Evropiane për të Drejtat e Njeriut, nënkupton që një gjykatë ka autoritetin për të dhënë një vendim detyrues, i cili nuk i nënshtrohet ndryshimit, miratimit ose ratifikimit nga ndonjë autoritet jogjyqësor.

Lidhur në mënyrë specifike me zbatimin e vendimeve të gjykatave kushtetuese, natyra e tyre përfundimtare dhe detyruese rrjedh domosdoshmërisht nga epërsia e Kushtetutës. Këto vendime duhet të respektohen nga të gjitha autoritetet publike dhe individët. Mosrespektimi i një vendimi të gjykatës kushtetuese është i barasvlershëm me shkeljen e vetë Kushtetutës.

Nga ky këndvështrim, zhvillimet e përmendura më sipër shkelin shtetin e së drejtës, pavarësinë e gjyqësorit dhe ndarjen e pushteteve. Ato gjithashtu dëmtojnë besimin te shteti dhe reformat pozitive të sistemit gjyqësor në Shqipëri, të cilat janë arritur deri më tani përmes përpjekjeve të mëdha.

Bordi i EAJ-së, për këtë arsye, shpreson që ky regres i propozuar të mund të parandalohet. Ai do të mbështesë anëtarin e tij, Unionin e Gjyqtarëve të Shqipërisë, në përpjekjet e tij për ta arritur këtë qëllim, do ta vendosë çështjen në rendin e ditës së Asamblesë së Përgjithshme të tij — e cila do të zhvillohet në tetor në Lisbonë dhe do të informojë aktorët përkatës ndërkombëtarë dhe evropianë për situatën alarmante në Shqipëri”, thuhet në reagim./ CNA