Interpelanca për bypassin e Elbasanit/ Karakaçi: Kosto 240 mln euro, në fokus reduktimi i trafikut

Pas nisjes së punimeve të bypass-it të Elbasanit, pritet hapja e procedurës tenderuese edhe për fazën e tretë, që do të përmbyllë lotin 1 të kësaj rruge.  Gjatë interpelancës së kësaj të enjte në kuvend të kërkuar nga deputeti i PD, Blendi Himçi, ministri i infrastukturës dhe Energjisë Enea Karakaçi ndau detaje mbi ndërtimin këtij Bypassi.

Gjatë fjalës së tij, Karakaçi u shpreh se objektivi kryesor i këtij  investimi synon të reduktojë ngarkesën e trafikut në hyrje-daljet e autostradës Tiranë-Elbasan, veçanërisht në zonën e Bradasheshit, e cila prej vitesh është një prej pikave më problematike për qarkullimin e automjeteve.

Në total, ndërtimi i bypass Elbasan kërkon 240 mln euro, teksa po punohet për sigurimin e financimit edhe për 2 lotet e tjerë. 

"Për shkak të përmasës dhe vlerës së lartë të këtij investimi, qasja jonë ka qenë që realizimi i tij të mbështetet në burimet e buxhetit të shtetit, por edhe me financime të huaja. Ndërkohë që vijojmë punën për sigurimin e financimit të plotë. Ne nuk kemi prokuruar të gjithë lotin 1. Kemi prokuruar fazën e parë të lotit 1, fazën e dytë po ashtu,  për të dyja këto faza janë lidhur kontratat dhe ndërkohë faza e tretë e lotit 1 është e buxhetuar në vitin 2027 dhe, për shkak të Ligjit të Buxhetit që e lejon mundësinë e bërjes së prokurimit, do të fillojë dhe do të vijojë prokurimi për këtë fazën e fundit të lotit të parë që në muajin shtator ose tetor. Ai do të përmirësojë lidhjen me Korridorin VIII dhe rrjetin kombëtar të infrastrukturës, do të lehtësojë lëvizjen e njerëzve dhe mallrave, si dhe do të rrisë aksesin drejt zonave ekonomike e industriale dhe do të krijojë kushte më të mira për investim dhe zhvillim", tha Karakaçi.

Më tej Ministri Karakaçi theksoi se projekti është i hartuar, mobilizimi në kantier dhe fazat e para kanë nisur nga puna, dhe po vijon paralelisht puna për sigurimin e financimit për realizimin e plotë të veprës.