Të paktën 25 persona janë shoqëruar nga policia pas tensioneve të regjistruara gjatë protestës së zhvilluar sot pran&eum...
POLITIKE
“Biden e dinte, por unë zgjodha gjykatën”, Berisha zbulon si u rikthye në SHBA
PiranjatPërditësimi i fundit 17 Shtator 2026, 22:04
Pas disa vitesh jashtë Shteteve të Bashkuara, Sali Berisha ka rrëfyer në “Opinion” përpjekjet që, sipas tij, çuan në heqjen e masës që i ndalonte hyrjen në SHBA. Gjatë bisedës me Blendi Fevziun, Berisha këmbënguli se nuk kishte zhvilluar një proces lobimi personal për heqjen e ndalimit. Ai tha se fillimisht kishte zgjedhur rrugën gjyqësore, duke iu drejtuar institucioneve të drejtësisë dhe duke angazhuar avokatë.
“Persistenca është çelësi i suksesit”, u shpreh Berisha, teksa tregoi se kishte ndjekur çështjen për vite me radhë.
Sipas tij, pas vendimit amerikan, ai kishte pasur kontakte me persona të njohur në administratën e atëhershme, por kishte zgjedhur të mos u kërkonte ndërhyrje. Berisha tha se edhe presidenti i atëhershëm, Joe Biden, ishte vënë në dijeni për çështjen përmes personave të tjerë.
Ai përmendi më pas edhe një tjetër përpjekje të zhvilluar në SHBA. Sipas Berishës, Charlie Black, të cilin e cilësoi si mik të tij dhe ish-këshilltar të Ronald Reagan, kishte ndërmarrë një nismë për të kundërshtuar bazën ligjore të përdorur për masën ndaj tij.Por kjo nuk solli ndryshimin e vendimit. Berisha tha se më pas, pas ndryshimit të administratës amerikane, u hap një tjetër kapitull për këtë çështje. Pikërisht këtu ai foli edhe për angazhimin e një kompanie lobimi, duke sqaruar se, sipas tij, nuk ishte kontraktuar prej tij personalisht.
Berisha tha se një fondacion i krijuar për të mbështetur Partinë Demokratike kishte marrë përsipër të financonte një kompani që do të punonte për këtë çështje. I pyetur drejtpërdrejt për kompaninë “Continental” dhe nëse ajo kishte lobuar për të, Berisha u përgjigj kategorikisht se angazhimi ishte bërë për PD-në.
“Jo, absolutisht jo! Ka lobuar kompania ‘Continental’”, tha ai.
Një tjetër moment i intervistës ishte ai që lidhej me koston e këtij angazhimi. Fevziu e pyeti nëse pagesat arrinin miliona euro, por Berisha tha se nuk e dinte shumën e saktë.
“Nuk kam marrë informacion, por faturat aty janë”, deklaroi ai, duke shtuar se, sipas informacionit të tij, çmimi kishte qenë ndër më të ulëtit.
Në lidhje me institucionet amerikane me të cilat mund të ketë komunikuar kompania, Berisha tha se nuk kishte informacion të detajuar, por përmendi Departamentin Amerikan të Shtetit, pasi vendimi për ndalimin e hyrjes ishte marrë nga ky institucion.
