Parlamenti grek ka votuar për heqjen e imunitetit parlamentar të ish-komisionerit europian Dimitris Avramopoulos, duke i hapur rrugë autoriteteve belge të vijojnë procedurat ndaj tij në kuadër të hetimit për skandalin e njohur si “Qatargate”.

Nga 266 deputetë të pranishëm, 264 votuan në favor të heqjes së imunitetit, ndërsa dy deklaruan “të pranishëm”. Më herët, Komisioni i Etikës i parlamentit kishte rekomanduar unanimisht heqjen e imunitetit.

Procedura lidhet me një urdhër arresti europian të lëshuar në qershor nga një gjyqtar hetues belg. Avramopoulos, 73 vjeç, deputet i partisë qeverisëse Demokracia e Re dhe ish-komisioner europian për Migracionin, i ka mohuar kategorikisht akuzat.

Vetë Avramopoulos kishte kërkuar heqjen e imunitetit, duke deklaruar se dëshiron të bashkëpunojë plotësisht me autoritetet dhe të paraqesë provat që, sipas tij, dëshmojnë se nuk ka lidhje me veprimtaritë nën hetim.

Hetimi belg lidhet ndër të tjera me marrëdhëniet e tij me organizatën joqeveritare “Fight Impunity”, të themeluar nga ish-eurodeputeti italian Antonio Panzeri. Avramopoulos ishte pjesë e bordit të nderit të organizatës gjatë viteve 2020-2021.

Ai pretendon se bashkëpunimi me organizatën ka qenë tërësisht i ligjshëm dhe se pagesat e marra janë deklaruar dhe taksuar.

Sipas dokumenteve të autoriteteve greke të cituara nga agjencitë ndërkombëtare, urdhër-arresti lidhet me dyshime për pjesëmarrje në organizatë kriminale, korrupsion publik dhe pastrim të të ardhurave nga veprimtari të paligjshme.