Kritika për KLGJ-në dhe KLP-në/ Rama: SPAK dhe GJKKO, dy suksese të reformës në drejtësi

Kryeministri Edi Rama, gjatë fjalës së tij në seancën e zhvilluar në orët e vona të së enjtes, ndau vlerësimet e tij për disa nga hallkat e rëndësishme të drejtësisë.

Sipas Ramës, Struktura e Posaçme Kundër Korrupsionit dhe Krimit të Organizuar (SPAK) dhe Gjykata Speciale për Korrupsion dhe Krim të Organizuar (GJKKO), janë dy suksese të Reformës në Drejtësi.

“Nëse reforma në drejtësi ka shumë arsye për të qenë të inkurajuar, dhe për t’ju sqaruar të gjithëve, nga ana ime unë dy suksese shoh në reformën në drejtësi: SPAK-un dhe GJKKO-në, me të gjitha problematikat që kanë. Dy suksese”, tha Rama.

Ndërsa ndaj Këshillit të Lartë Gjyqësor dhe Këshillit të Lartë të Prokurorisë, Rama u shpreh me kritika të ashpra, duke i quajtur të falimentuara.

 “Por, nëse ka një faliment, janë ato dy këshilla atje. Dhe nëse ka një arsye për t’u shqetësuar Kuvendi i Shqipërisë, është pikërisht të reflektojë mbi reformën në drejtësi. Dhe jo mbi atë pjesë të reformës që është bërë lajtmotivi kryesor përditë e përditë: ‘Burg, burg, burg, burg, burg!’, por mbi atë pjesë të reformës që është lajtmotivi i jetës së atyre dhjetëra mijëra njerëzve që janë kthyer në dosje të mbuluara me pluhur”, u shpreh Rama./CNA