Një avion luftarak italian F-2000 është goditur gjatë një serie sulmesh në bazën ajrore Ta’if në Arabinë Saudite, ku ndodhet edhe personel ushtarak italian në kuadër të Operacionit “Inherent Resolve”. Lajmi është bërë i ditur nga ministri italian i Mbrojtjes, Guido Crosetto.
Crosetto deklaroi se e ka ndjekur nga afër situatën në bazën ajrore, e cila është vënë në shënjestër të disa sulmeve. Sipas tij, gjatë incidentit nuk ka pasur të lënduar apo persona të përfshirë nga radhët e personelit ushtarak italian.
“Gjatë sulmit, u godit një aeroplan italian F-2000. Ai ndodhej brenda bazës, në një zonë të largët. Nuk ka dëme të tjera në automjete apo infrastrukturë të përdorur nga personeli ynë”, tha Crosetto.
Ministri italian bëri të ditur se kishte kërkuar një vlerësim të plotë të situatës, përfshirë gjendjen e personelit italian dhe opsionet e mundshme operative në vijim.
Ai shtoi se masat e sigurisë për mbrojtjen e trupave italiane ishin vendosur prej kohësh dhe se situata po monitorohet në mënyrë të vazhdueshme.
“Situata po ndiqet me vëmendjen më të madhe, me qëllim sigurimin e mbrojtjes së plotë të personelit tonë dhe operimin me përgjegjësinë e nevojshme”, u shpreh ministri italian i Mbrojtjes.
Sulmi ndaj bazës ajrore Ta’if vjen në një periudhë përshkallëzimi të tensioneve në rajon. Arabia Saudite është përballur ditët e fundit me një seri sulmesh me raketa dhe dronë, të cilat u janë atribuuar rebelëve Houthi.
Ndërkohë, luftime të intensifikuara janë raportuar edhe në Jemen, mes forcave qeveritare dhe rebelëve Houthi, veçanërisht që prej fillimit të muajit korrik.
Autoritetet italiane vijojnë të monitorojnë situatën dhe zhvillimet në bazën ku ndodhet personeli i tyre ushtarak.