Situata është tensionuar të premten në Ceuta të Spanjës, ku mijëra emigrantë kanë dalë në rrugët e qytetit dhe janë drejtuar në mënyrë masive drejt një qendre të re strehimi të ngritur pranë portit.
Autoritetet spanjolle kishin nisur një operacion për transferimin e emigrantëve që prej javësh jetonin në kushte të vështira, në plazhe dhe në strehimore të improvizuara. Por procesi u shoqërua me kaos, pasi një numër i madh personash nxituan drejt kampit të ri për të siguruar një vend.
Operacioni nisi rreth orës 06:30, sipas kohës lokale. Një burim qeveritar spanjoll në Ceuta tha se policia ndërhyri për të vendosur situatën nën kontroll, ndërsa mediat lokale raportuan për angazhimin e Policisë Kombëtare dhe njësive të kontrollit të trazirave. Ka gjithashtu raportime për përdorimin e gazit lotsjellës.
Pamjet e publikuara nga vendngjarja tregojnë turma të mëdha emigrantësh duke vrapuar nëpër rrugët e qytetit. Në disa prej videove, njerëzit shfaqen duke bërtitur dhe festuar ndërsa drejtohen drejt qendrës së re të akomodimit.
Kampi i ndërtuar pranë portit ka kapacitet për rreth 1,700 persona dhe është pajisur me tenda, shtretër dhe dushe. Qeveria spanjolle ka vendosur të vijojë procesin e transferimit, pavarësisht kundërshtimeve të shprehura nga autoritetet lokale.
Kriza në Ceuta nisi të përkeqësohej në fund të korrikut, kur dhjetëra mijëra emigrantë kaluan nga Maroku drejt enklavës spanjolle në Afrikën e Veriut. Shumica e tyre janë kthyer, por sipas autoriteteve lokale, rreth 13 mijë persona ndodhen ende në zonë, ndërsa shumë prej tyre janë detyruar të qëndrojnë në plazhe dhe strehimore të improvizuara.
Kryeministri spanjoll, Pedro Sanchez, është përballur me kritika për mënyrën se si qeveria ka menaxhuar situatën. Sanchez i ka hedhur poshtë akuzat për keqmenaxhim, duke argumentuar se shërbimet shtetërore u përballën me një numër mbërritjesh që tejkalonte kapacitetet e tyre.
Gjatë një daljeje televizive më 14 shtator, Sanchez pranoi se autoritetet ishin të mbingarkuara nga numri i emigrantëve që mbërritën në Ceuta. Ai deklaroi se synimi i qeverisë është që situata të jetë nën kontroll deri në fund të vitit, ndërsa u kërkoi durim rreth 84 mijë banorëve të qytetit.
Ndërkohë, janë ngritur pikëpyetje edhe nëse qeveria spanjolle ishte informuar paraprakisht për mbërritjen masive të emigrantëve.
Fillimisht, autoritetet deklaruan se nuk kishte pasur paralajmërime për atë që do të ndodhte. Më pas, qeveria publikoi 40 komunikime të deklasifikuara, sipas të cilave Qendra Kombëtare e Inteligjencës së Spanjës, CNI, kishte raportuar më 29 korrik për përpjekje të organizuara për të hyrë në Ceuta nga toka dhe deti.
Një prej komunikimeve i referohej edhe një thirrjeje në rrjetet sociale për një kalim masiv mbrëmjen pasuese. Sipas “Daily Mail”, CNI ia kishte përcjellë informacionin edhe shërbimeve të inteligjencës marokene.
Megjithatë, Sanchez ka kundërshtuar interpretimin se këto komunikime përbënin një paralajmërim zyrtar për përmasat e ngjarjeve që pasuan.
Përveç krizës së strehimit, banorët e Ceutës kanë shprehur shqetësime edhe për sigurinë. Sipas raportimeve të mediave britanike, në zonë janë regjistruar incidente të dhunshme, sulme ndaj ushtarëve dhe raste të sulmeve seksuale.
Prokurorja e Ceutës, Silvia Rojas, ka folur për një “rritje eksponenciale” të kriminalitetit, duke iu referuar edhe rasteve të sulmeve seksuale dhe incidenteve ku janë përfshirë të mitur.
Ekspertë të sigurisë publike kanë paralajmëruar gjithashtu për rrezikun e përshkallëzimit të mëtejshëm të tensioneve në qytet.
Një tjetër shqetësim lidhet me kushtet sanitare në kampet e improvizuara. Një adoleshent nga Maroku është diagnostikuar këtë javë me linë e majmunëve dhe është vendosur në izolim, ku po merr trajtim. Ndërkohë, mes emigrantëve janë raportuar të paktën pesë raste tuberkulozi.
Presidenti rajonal i Ceutës, Juan Jesús Vivas, ka kërkuar më shumë mbështetje nga Bashkimi Evropian, duke e përshkruar situatën në qytet si një “tenxhere me presion” që mund të shpërthejë në çdo moment.
“Qyteti është krejtësisht i ndryshëm nga ai që ishte para kësaj ngjarjeje. Njerëzit e Ceutës e kanë humbur gëzimin dhe mënyra e tyre e jetesës është tronditur plotësisht”, u shpreh Vivas para eurodeputetëve.