Përfaqësues të Administratës Amerikane Kundër Drogës (DEA) zhvilluan në fillim të gushtit takime me zyrtarë të zbatimit të ligjit në Buenos Aires, ku një nga çështjet e diskutuara ishte edhe zgjerimi i dyshuar i grupeve kriminale shqiptare në rajon.
Sipas raportimeve të mediave lokale, autoritetet kanë ngritur shqetësime për mundësinë e shtrirjes së rrjeteve kriminale shqiptare, të njohura për përfshirjen në trafikun ndërkombëtar të drogës.
Në muajt e fundit, autoritetet uruguaiane kanë evidentuar hyrje të disa shtetasve shqiptarë në vend. Megjithatë, burime policore bëjnë të ditur se shumica e tyre kanë hyrë për qëllime turistike.
Disa shtetas shqiptarë kanë qëndruar në hotele pranë Aeroportit Ndërkombëtar Carrasco, pasi fluturimet e tyre janë anuluar.
Pavarësisht monitorimit të lëvizjeve, policia uruguaiane thotë se deri tani nuk ka evidentuar aktivitet kriminal që mund t'i atribuohet grupeve të mafies shqiptare në territorin e vendit.
Autoritetet po ndjekin me vëmendje këto lëvizje për shkak të përfshirjes së dokumentuar të disa grupeve kriminale shqiptare në rrjete ndërkombëtare të trafikut të drogës.
Grupet kriminale shqiptare u konsoliduan pas viteve ’90 dhe ndër vite kanë krijuar lidhje me organizata kriminale në vende të ndryshme evropiane. Mes lidhjeve të përmendura në raportime është edhe ajo me mafien kalabreze, ku ka qenë i përfshirë trafikanti italian Rocco Morabito, i arrestuar në Uruguay.
Megjithatë, deri në këtë fazë, autoritetet uruguaiane nuk kanë bërë të ditur zbulimin e ndonjë strukture apo aktiviteti konkret të mafies shqiptare në vend./Versus.al
