Heroi 10-vjeçar, djali me autizëm shpëton familjen nga zjarri në shtëpi
Një 10-vjeçar me autizëm është cilësuar si hero pasi shpëtoi motrën e vogël gjatë një zjarri që shpërtheu në shtëpinë e tyre në Prospect Vale, në veri të Tasmanisë. Oliver, i njohur si “Ollie”, kuptoi se diçka nuk shkonte në kuzhinë dhe njoftoi menjëherë nënën e tij.
Më pas, djali mori motrën e vogël në krahë dhe e nxori jashtë shtëpisë në një vend të sigurt. Nëna e tij, Stacey Brunskill, arriti të kufizojë flakët me një batanije kundër zjarrit dhe më pas përdori një fikëse zjarri, ndërsa një fqinj njoftoi shërbimet e emergjencës.
Ollie tregoi se kishte parë një “flakë të madhe” me cepin e syrit dhe mendimi i parë ishte t’i tregonte nënës. “Duhet të qëndroja i qetë, sepse nëse do të panikoja unë, mamaja do të panikonte edhe më shumë”, tha ai. Më vonë u konstatua se zjarri kishte nisur nga një prerëse perimesh e lënë aksidentalisht mbi një sobë të nxehtë.
Nëna e tij tregoi se Ollie, i cili ka autizëm të nivelit 2 dhe ADHD, zakonisht nuk është ndër fëmijët më të qetë, por në atë moment reagoi me qetësi dhe përqendrim. “Nëse Oliver nuk do të ishte këtu, ndoshta as ne nuk do të ishim këtu”, u shpreh ajo.
Për veprimin e tij, Ollie u vlerësua publikisht nga Shërbimi Zjarrfikës i Tasmanisë dhe më 2 shtator u nderua me një certifikatë trimërie në shkollën e tij. Nëna e tij u bëri thirrje prindërve të kenë në shtëpi pajisje bazë kundër zjarrit, duke theksuar se batanija kundër zjarrit dhe fikësja ndihmuan që flakët të mos përhapeshin.
/vizionplus.tv
