Kryetari i Bashkisë së Tiranës, Erion Veliaj, ka reaguar pas vendimit të Gjykatës së Lartë për të lënë në fuqi masën e sigurisë “arrest në burg” ndaj tij.
Në një reagim të publikuar katër ditë pas vendimit, Veliaj thotë se prej 19 muajsh ndodhet në izolim dhe nuk ka mundësi të ushtrojë mandatin si kryetar i Bashkisë së Tiranës.
“Po bëj 19 muaj në izolim. Nëntëmbëdhjetë muaj pa mundësinë reale për të ushtruar mandatin kushtetues që më kanë besuar qytetarët e Tiranës me një rekord historik votash. Vetëm pak ditë më parë u mor një tjetër vendim gjyqësor që ishte një grusht institucional ndaj demokracisë vendore”, u shpreh Veliaj.
Gjykata e Lartë, më 15 shtator, la në fuqi vendimin e Gjykatës së Posaçme të Apelit për Korrupsionin dhe Krimin e Organizuar për masën e sigurisë ndaj Veliajt. Vendimi u mor nga Kolegji Penal në Dhomë Këshillimi, pas shqyrtimit të rekursit të paraqitur nga mbrojtja e kryebashkiakut.
Çështja ishte rikthyer në Gjykatën e Lartë pas një vendimi të Gjykatës Kushtetuese, e cila kishte kërkuar rishqyrtimin e proporcionalitetit të masës së sigurisë.
Veliaj ndodhet në paraburgim që prej shkurtit 2025, ndërsa ndaj tij vijon procesi gjyqësor. SPAK e akuzon për 13 vepra penale, përfshirë korrupsionin pasiv, pastrimin e parave, mosdeklarimin e pasurisë, shpërdorimin e detyrës dhe futjen e sendeve të ndaluara në burg. Veliaj i ka mohuar akuzat.
Reagimi i tij për vendimin e Gjykatës së Lartë erdhi në të njëjtën ditë kur ai propozoi që katër ish-krerët e UÇK-së, Hashim Thaçi, Kadri Veseli, Jakup Krasniqi dhe Rexhep Selimi, të shpallen “Qytetarë Nderi” të Tiranës.
Për vendimin ndaj tij, Veliaj e cilësoi atë si goditje ndaj demokracisë vendore, ndërsa Gjykata e Lartë ka argumentuar në vendimin e saj publik vetëm se ka lënë në fuqi vendimin e Apelit të Posaçëm.