Shqipëria do të bëhet pjesë e Marrëveshjeve Artemis, kuadrit ndërkombëtar të bashkëpunimit për eksplorimin dhe përdorimin paqësor të hapësirës, me nënshkrimin që do të zhvillohet më 21 shtator në selinë e NASA-s në Washington.
Ceremonia do të zhvillohet të hënën dhe do të shënojë përfshirjen e Shqipërisë si vendi i 73-të pjesëmarrës në Marrëveshjet Artemis, të cilat vendosin parime për bashkëpunimin ndërkombëtar në eksplorimin civil të Hënës, Marsit dhe më gjerë.
Aktiviteti do të organizohet nga zv.administratori i NASA-s, Matt Anderson, i cili do të presë ministrin për Evropën dhe Punët e Jashtme të Shqipërisë, Ferit Hoxha, si dhe ambasadorin shqiptar në Shtetet e Bashkuara, Ervin Bushati. Në ceremoni pritet të marrin pjesë edhe përfaqësues të Departamentit Amerikan të Shtetit.
Sipas njoftimit të NASA-s, ceremonia do të zhvillohet me pjesëmarrje fizike. Përfaqësuesit e medias që dëshirojnë të jenë të pranishëm duhet të konfirmojnë pjesëmarrjen pranë agjencisë amerikane.
Ambasada e SHBA-së në Tiranë e ka cilësuar këtë zhvillim si një moment të rëndësishëm për Shqipërinë.
“Një hap gjigant për Shqipërinë! Shqipëria do të nënshkruajë Marrëveshjet Artemis më 21 shtator në selinë e NASA-s në Washington, duke u bërë vendi i 73-të që i bashkohet kësaj nisme, e cila përfshin një sërë parimesh praktike që synojnë të rrisin sigurinë, transparencën dhe koordinimin e eksplorimit civil të hapësirës në Hënë, Mars dhe më gjerë”, shkruan Ambasada Amerikane në Tiranë.
Marrëveshjet Artemis u krijuan në vitin 2020, gjatë administratës së parë të Donald Trump, me Shtetet e Bashkuara, të udhëhequra nga NASA dhe Departamenti i Shtetit, së bashku me shtatë vende të tjera si nënshkruesit e parë.
Nisma u krijua në një periudhë kur interesi ndërkombëtar për eksplorimin e Hënës dhe aktivitetet hapësinore po rritej, si nga qeveritë, ashtu edhe nga kompanitë private.
Marrëveshjet përcaktojnë një sërë parimesh praktike për zhvillimin e aktiviteteve civile në hapësirë, duke synuar rritjen e sigurisë, transparencës dhe koordinimit mes vendeve pjesëmarrëse.
Përmes tyre, vendet angazhohen për bashkëpunim në eksplorimin dhe përdorimin paqësor të hapësirës, përfshirë misionet drejt Hënës, Marsit dhe destinacioneve të tjera hapësinore.
Nënshkrimi i marrëveshjes më 21 shtator do ta përfshijë Shqi