Zabërgja nuk ndalet! Vjen goli i katërt i sezonit në Ukrainë

Baton Zabërgja po kalon një moment të mirë në kampionatin ukrainas, duke gjetur sërish rrugën e rrjetës.

Ish-sulmuesi i Dinamos shënoi golin e dytë në fitoren 2-0 të Metalist Kharkiv ndaj Bukovynas, në sfidën e vlefshme për javën e shtatë të kampionatit.

Zabërgja realizoi në minutën e 70-të, duke marrë topin në krahun e djathtë të zonës, shmangur mbrojtësin dhe dërguar topin në rrjetë.

Ky ishte goli i tij i katërt në kampionat këtë sezon, ndërsa ka regjistruar edhe një asistim.
25-vjeçari u aktivizua deri në minutën e 85-të, kur i la vendin Ermir Rashicës.

Me paraqitjet e tij të fundit, Zabërgja po konfirmon formën që e ka bërë pjesë të listës së Kombëtares së Kosovës për ndeshjet e radhës.

Një tjetër gol, një tjetër sinjal i fortë nga sulmuesi kosovar, i cili po kërkon të shfrytëzojë çdo mundësi për të fituar një rol edhe më të rëndësishëm me përfaqësuesen.