Barcelona, makineri perfekte. Raphinha mposht i vetëm Sevillan

Barcelona duket e pandalshme në La Liga. Skuadra e udhëhequr nga Hansi Flick arriti fitoren e shtatë radhazi pasi mposhti Sevillan me rezultatin 1-3 në transfertën e vështirë të "Ramon Sanchez Pizjuan".

Edhe pse vendasit kaluan të parët në avantazh me anë të Fofana në minutën e 19-të, reagimi i katalanasve ishte i menjëhershëm.

Raphinha barazoi shifrat vetëm tri minuta më vonë, duke i dhënë frymëmarrje ekipit të tij. Në pjesën e dytë, sulmuesi brazilian shkëlqeu sërish duke realizuar edhe dy gola të tjerë në minutat 52 dhe 69.

Një kontribut të madh në këto dy realizime vendimtare e pati edhe Lamine Yamal me asistet e tij.

Falë kësaj performance nga Raphinha, Barcelona mori tri pikët e radhës në La Liga.

Përmes këtij triumfi, katalanasit mbrojnë kryesimin në tabelë me 21 pikë të grumbulluara, duke thelluar përkohësisht diferencën me ndjekësit.