Presidenti amerikan Donald Trump ka ndërprerë qëndrimin e planifikuar në rezidencën presidenciale Camp David dhe është kthyer në Shtëpinë e Bardhë, një ditë më herët se sa ishte parashikuar, në një kohë kur tensionet në Lindjen e Mesme janë përshkallëzuar.
Trump kishte planifikuar të qëndronte gjatë gjithë fundjavës në Camp David, ndërsa sipas agjendës së publikuar më herët, kthimi i tij në Uashington ishte parashikuar për të dielën. Administrata amerikane nuk ka dhënë një arsye zyrtare për ndryshimin e papritur të axhendës së presidentit.
Megjithatë, kthimi i parakohshëm i Trumpit në Uashington vjen në një moment të ndjeshëm për situatën në Lindjen e Mesme, pas një sulmi të pretenduar nga rebelët Houthi ndaj kryeqytetit saudit, Riadit.
Të shtunën, Houthit deklaruan se kishin sulmuar me raketa dhe dronë disa objektiva në Riad. Forcat e koalicionit të udhëhequr nga Arabia Saudite thanë se kishin interceptuar një raketë balistike të drejtuar drejt kryeqytetit, ndërsa autoritetet saudite aktivizuan alarmet e mbrojtjes ajrore. Më pas u dha njoftimi për përfundimin e rrezikut.
Ky zhvillim përbën një përshkallëzim të rëndësishëm, pasi sulmet e Houthive ndaj Arabisë Saudite gjatë kësaj vale të konfliktit kishin prekur kryesisht qytete të tjera, infrastrukturën energjetike dhe objektiva përgjatë Detit të Kuq. Sulmi i raportuar ndaj Riadit ishte ndër zhvillimet më të fundit që kanë rritur shqetësimet për zgjerimin e konfliktit në rajon.
Në të njëjtën kohë, Sekretari amerikan i Mbrojtjes, Pete Hegseth, është kthyer drejt Uashingtonit pas një vizite në Teksas, ku kishte marrë pjesë në aktivitete të planifikuara më herët. Lëvizja e tij është raportuar në të njëjtën kohë me kthimin e Trumpit në Shtëpinë e Bardhë.
Ndërkohë, Departamenti Amerikan i Shtetit lëshoi të shtunën një alarm sigurie për qytetarët amerikanë në Lindjen e Mesme, duke përmendur sulmet e Houthive dhe rrezikun e përshkallëzimit të mëtejshëm të situatës.
Departamenti i Shtetit u bëri thirrje amerikanëve që ndodhen në rajon të tregohen më vigjilentë, ndërsa qytetarëve amerikanë jashtë Lindjes së Mesme u kërkoi të “rishqyrtojnë seriozisht udhëtimin për në dhe përmes rajonit”.
Kthimi i Trumpit në Uashington nuk është shoqëruar deri tani me një njoftim zyrtar që ta lidhë drejtpërdrejt vendimin me zhvillimet ushtarake në Lindjen e Mesme. Megjithatë, koha e lëvizjes së presidentit përkon me rritjen e tensioneve dhe me paralajmërimet e reja amerikane për sigurinë në rajon.
President Trump returns to the White House Saturday evening after departing Camp David as his administration weighs its next steps in the war with Iran. Trump is preparing for a major week in New York, where the Iran conflict is expected to be a focus as world leaders gather for the U.N. General Assembly. Iran says it has presented conditions for ending the conflict and is awaiting Trump’s response.
— Fox News (@FoxNews) September 20, 2026