Dy persona janë arrestuar në Gjirokastër në kuadër të një operacioni kundër kontrabandës së mallrave nga Greqia, ndërsa policia ka sekuestruar 22 695 euro, 100 steka cigare dhe një sasi të konsiderueshme mallrash të ndryshme.
Operacioni policor, i koduar “Akciza 3”, u finalizua nga specialistët e Seksionit për Hetimin e Krimeve Ekonomiko-Financiare, në vijim të informacioneve të siguruara nga Agjencia e Mbikëqyrjes Policore Rajonale Vlorë-Gjirokastër.
Dy 43-vjeçarët, me inicialet O. L. dhe M. D., të dy banues në Tiranë, u kapën në flagrancë në aksin rrugor “Kakavijë-Gjirokastër”, teksa transportonin me autobus mallra që dyshohet se ishin kontrabanduar nga Greqia.
Gjatë kontrollit të autobusit, që dy shtetasit e drejtonin me radhë, shërbimet e Policisë gjetën të fshehura në ambiente të mbyllura 100 steka me cigare dhe 22 695 euro.
Ndërkohë, në bagazhin e autobusit u zbuluan kuti me produkte të ndryshme deti dhe mishi, produkte bulmeti, kuti me medikamente, si dhe 13 thasë me veshje të markave të ndryshme. Krahas tyre, policia sekuestroi edhe mallra të tjera, të cilat dyshohet se ishin futur në Shqipëri në mënyrë të paligjshme nga Greqia.
Në cilësinë e provës materiale u sekuestruan gjithashtu autobusi dhe një aparat celular.
Dy 43-vjeçarët akuzohen për disa vepra penale që lidhen me kontrabandën, përfshirë “Kontrabanda me mallra të ndaluara ose të kufizuara”, “Kontrabanda me mallra për të cilat paguhet akcizë ose me pezullim të plotë apo të pjesshëm nga detyrimet doganore ose të akcizës”, “Kontrabanda me mallra të tjera” dhe “Tregtimi dhe transportimi i mallrave që janë kontrabandë”.
Në ngarkim të tyre janë referuar gjithashtu veprat penale “Mosdeklarimi në kufi i të hollave dhe i sendeve me vlerë”, “Fshehja e të ardhurave” dhe “Pastrimi i produkteve të veprës penale ose veprimtarisë kriminale”.
Policia bën me dije se hetimet vijojnë për dokumentimin e plotë të rastit dhe identifikimin e personave të tjerë që mund të jenë të përfshirë në këtë veprimtari kriminale.
Materialet procedurale i janë kaluar Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër për veprime të mëtejshme.