Shkrimtarja Alba Gega sjell librin e saj të dytë, “Të jesh apo të mos jesh”, një novelë që ndërthur krizën ekzistenciale, dilemat shekullore dhe përjetimet e thella psikologjike të individit në botën moderne.
E shkrirë në fragmente, novela përthyhen përmes një rrëfimi që depërton në botën e brendshme të njeriut, duke e ftuar lexuesin të “zhytet” në aisbergun e ndjesive, mendimeve dhe përjetimeve që shpesh mbeten të padukshme në sipërfaqe.
Në qendër të veprës qëndron Toni, një personazh që mund të jetë pak nga të gjithë ne, njerëzit e kësaj kohe moderne, të përballur me dilema ekzistenciale, kontradikta të brendshme dhe kërkimin e kuptimit.
Novela e “copëtuar” ndërtohet përmes personazhesh të paparashikueshëm dhe një dinamike ngjarjesh që shtrihet në dy botë: atë reale dhe atë psikologjike. Këto dy plane ndërthuren në një rrëfim ku kufijtë mes përjetimit dhe realitetit bëhen pjesë e eksplorimit letrar.
Intertekstualiteti estetik-filozofik, së bashku me strukturën fragmentare dhe leximin e thellë të psikologjisë njerëzore, përbëjnë disa nga elementet funksionale të kësaj novele.
Me këtë botim, Alba Gega sjell për lexuesin një vepër që e vendos njeriun, dilemat e tij dhe botën e padukshme të ndjesive në qendër të rrëfimit letrar.
“Të jesh apo të mos jesh” është libri i dytë i autores Alba Gega.
Alba Gega tashmë nuk na surprizon më me prurjet e saj letrare. Dora e një studenteje të dalluar, e cila gëzon respektin dhe njohjen profesionale të pedagogëve dhe studiuesve, profesorëve të letërsisë, dëshmon një formim që shkon përtej përvojës krijuese.
E certifikuar që në vitet e shkollimit si nxënëse e dalluar, Alba sjell sot një ndërthurje të dijes, formimit akademik dhe imagjinatës letrare. Përvoja e saj në studimin e letërsisë dhe prirja për të eksploruar botën e brendshme të njeriut bëhen pjesë e një krijimtarie që synon të ndërtojë vepra me dimension profesional dhe estetik.
Me librin e dytë, “Të jesh apo të mos jesh”, Alba Gega dëshmon se dija dhe imagjinata mund të bashkohen në një rrëfim që fton lexuesin të mendojë, të ndiejë dhe të zbulojë thellësitë e njeriut.
