Analisti Genc Burimi ka paralajmëruar për pasojat që, sipas tij, mund të sjellë shtimi i sulmeve hibride ruse ndaj vendeve europiane, duke argumentuar se një prej objektivave të Moskës është ndikimi mbi klimën politike në kontinent.
Në një intervistë për SYRI TV Burimi tha se Rusia synon të krijojë përçarje mes vendeve europiane dhe të favorizojë forcat politike që kundërshtojnë mbështetjen ushtarake dhe politike për Ukrainën.
Sipas tij, sa më gjatë të vazhdojnë këto sulme, aq më e madhe është mundësia që në disa vende europiane të rritet mbështetja për parti që kërkojnë një qasje më të tërhequr ndaj luftës në Ukrainë.
“Qëllimi është që Evropa të jetë e përçarë dhe të gjitha qeveritë evropiane të ndajnë të njëjtat vlera me këtë të Moskës”, deklaroi Burimi.
Ai solli si shembull situatën në Gjermani dhe rritjen e mbështetjes për AfD-në, duke e lidhur këtë, sipas interpretimit të tij, me qëndrimin e kësaj force politike ndaj luftës në Ukrainë.
Burimi paralajmëroi se nëse lufta hibride ruse vijon të intensifikohet, në vendet europiane mund të fitojnë terren parti që kërkojnë të kufizojnë ose të ndalojnë ndihmën për Ukrainën.
“E ardhmja do jetë që të sjellin në pushtet te ne parti më reaksionare, që nuk i bëjnë luftë Rusisë. Pra, që nuk ndihmojnë Ukrainën”, u shpreh ai.
Më tej, analisti e zgjeroi skenarin e tij edhe te çështja e armëve bërthamore. Sipas Burimit, kërcënimi rus mund t’i shtyjë disa shtete europiane të kërkojnë garanci të reja strategjike dhe mbështetje bërthamore nga aleatët.
Ai përmendi Lituaninë dhe Poloninë, ndërsa tha se një debat i tillë mund të shtrihet më vonë edhe në Gjermani.
“E ardhmja është pak më e zymtë se kaq. E ardhmja është frika që do bëhet gjithnjë e më e vërtetë: frika e përhapjes së bombës bërthamore”, tha Burimi.
Në fund, ai e lidhi këtë skenar edhe me zhvillimet në Lindjen e Mesme, duke argumentuar se një Iran me armë bërthamore do të përbënte, sipas tij, një kërcënim të drejtpërdrejtë për sigurinë europiane.
