Egnatia dominon dhe mposht Partizanin, kryeqytetasit në krizë

Egnatia u rikthye te fitorja në Superiore, duke mposhtur 2-1 Partizanin në javën e pestë të kampionatit.

Kampionët e nisën më mirë ndeshjen dhe kaluan në avantazh në minutën e 31-të me Loukilin, pas një goditjeje nga distanca.

Egnatia vazhdoi të kontrollonte lojën edhe në pjesën e dytë dhe Albanese dyfishoi rezultatin në minutën e 71-të me një tjetër goditje nga larg.

Partizani reagoi menjëherë dhe Murataj shënoi dy minuta më vonë, me topin që u devijua para se të përfundonte në rrjetë.

Miqtë patën mundësi për të barazuar, ndërsa Bintsuka humbi një rast të mirë dhe Dajsinani ndaloi një tjetër tentativë.

Në fund, Egnatias iu anulua një gol i Ildi Grudës për pozicion jashtë loje, ndërsa Partizani nuk arriti të krijonte rastin për barazim.

Me këtë fitore, Egnatia ngjitet në vendin e dytë me 12 pikë. Partizani mbetet në vendin e shtatë me 4 pikë, duke pësuar humbjen e dytë radhazi.