Një përplasje e dyshuar për kontrollin e trafikut të drogës ka tronditur gjatë muajve korrik dhe gusht zonën e Vittorias, në provincën e Raguzës, në juglindje të Siçilisë.
Sipas një investigimi të gazetarit Giuseppe Bascietto, publikuar nga “Gli Stati Generali”, përballë një grupi të lidhur me Giovanni Gurrierin qëndron një rrjet shqiptar me lidhje të konsoliduara në Vittoria, Santa Croce Camerina dhe përgjatë bregdetit të Raguzës.
Në rindërtimin e medias italiane përmenden kërcënime, agresione, djegia e një automjeti dhe një përleshje e dhunshme në lokalin “La Lucciola”.
Në qendër të investigimit janë dy shqiptarë, Auglent “Denny” Lalollari dhe Luzim Ndreu, i njohur me nofkën “Giuliu ’u Tistuni”. Sipas burimeve të cituara nga investigimi, të dy do të ishin pjesë e të njëjtit ambient kriminal.
Sipas rindërtimit të publikuar, konflikti dyshohet se nisi në lokalin “La Lucciola”, ku Giovanni Gurrieri u ka kërkuar disa personave, të cilët burimet i lidhin me Ndreun, të ndërprisnin aktivitetin e drogës.
Gurrieri më pas dyshohet se ka kërkuar një takim me personin që konsiderohej si drejtues i këtij grupi. Takimi nuk është zhvilluar dhe, pak ditë më vonë, një automjet që i përkiste Ndreut dyshohet se është djegur.
Përplasja do të rikthehej më pas në “La Lucciola”. Sipas investigimit, Ndreu dhe Gurrieri janë përfshirë në një konflikt fizik, ndërsa pronari i lokalit, Leandro Li Calzi, mbeti i dëmtuar teksa tentonte të ndalonte përleshjen.Investigimi përmend gjithashtu vëllezërit Di Modica, të cilët sipas burimeve të cituara konsiderohen të afërt me ambientet e Matriali dhe me një figurë të njohur me nofkën “u Puorcu”.
Sipas rindërtimit, ata dyshohet se janë sulmuar në banesat e tyre, edhe në prani të familjarëve. Media italiane e lidh këtë episod me ekuilibrat kriminalë në territor dhe me marrëdhëniet mes grupeve lokale dhe rrjetit shqiptar.
Njëri prej vëllezërve, Aurelio Di Modica, rezulton sipas investigimit i pandehur në të njëjtin proces gjyqësor ku figuron edhe Auglent “Denny” Lalollari.Në investigim rikthehet edhe marrëdhënia mes Lalollarit dhe Ndreut. Burimet e cituara i përshkruajnë si persona të të njëjtit ambient dhe flasin për një raport të afërt mes tyre.
Në disa dëshmi ata përmenden si “xhaxhai dhe nipi”, por vetë investigimi thekson se kjo shprehje nuk provon një lidhje familjare. Ajo mund të lidhet me diferencën në moshë, autoritetin apo pozicionin që secili dyshohet se ka pasur në këtë rrjet.
Sipas “Gli Stati Generali”, përplasja e muajve të fundit mund të jetë pjesë e një beteje më të gjerë për kontrollin e territorit dhe të tregut të drogës në zonën e Raguzës, ku grupe të ndryshme lokale dhe shqiptare dyshohet se ruajnë autonominë e tyre, por njëkohësisht kanë lidhje dhe interesa të përbashkëta.
Megjithatë, bëhet fjalë për një rindërtim investigativ të bazuar në burime të cituara nga media italiane. Përgjegjësitë konkrete të personave të përmendur duhet të përcaktohen nga hetimet dhe proceset gjyqësore përkatëse./Versus.al
