Zgjedhjet parlamentare në Rusi/ Rezultatet e para tregojnë fitore të sigurt për partinë e Putinit

Partia në pushtet, “Rusia e Bashkuar” e Vladimir Putinit, kryeson zgjedhjet parlamentare në Rusi. Sipas rezultateve të para të publikuara nga Komisioni Qendror i Zgjedhjeve, me rreth 14% të votave të numëruara, partia ka siguruar 57,5% të votave.

Ndërkohë, një exit-poll i realizuar nga Qendra Ruse për Kërkimin e Opinionit Publik (VCIOM), një institut shtetëror, e vlerëson rezultatin e Rusisë së Bashkuar në 49,4%, afërsisht në të njëjtin nivel me zgjedhjet e vitit 2021.

Votimi zgjati tre ditë dhe ishte zgjedhja e parë parlamentare që u zhvillua në Rusi pas nisjes së pushtimit rus të Ukrainës në vitin 2022. Qytetarët votuan për 450 anëtarët e Dumës Shtetërore, dhomës së ulët të parlamentit rus, si dhe për autoritetet lokale.

Zgjedhjet u zhvilluan gjithashtu në territore të Ukrainës të pushtuara nga Rusia dhe të cilat Moska pretendon se i ka aneksuar. Këto pretendime nuk njihen nga Ukraina dhe shumica e komunitetit ndërkombëtar.

Procesi zgjedhor është zhvilluar në një klimë të kufizuar politike, ndërsa autoritetet ruse kanë shtypur ashpër zërat kundërshtues. Partia “Jabloko”, e cila ka kundërshtuar hapur luftën në Ukrainë, u përjashtua nga gara. Rezultatet përfundimtare priten pas përfundimit të numërimit të të gjitha votave. /CNA