Koreja e Jugut po eksperimenton me një mënyrë interesante për t’i larguar turistët nga itineraret klasike të Seulit dhe Busanit: në vend që t’u thotë thjesht të vizitojnë qytete më të vogla, po u jep një arsye konkrete për të shkuar atje. Një program i ri turistik po kombinon personazhe të njohur, eksperienca lokale dhe madje itinerare të frymëzuara nga feng shui, në përpjekje për të kthyer zonat më pak të vizituara në destinacione më tërheqëse.
Ideja është që udhëtari të mos marrë thjesht një listë me monumente. Disa programe përdorin figura publike si udhërrëfyes për të prezantuar qytetin përmes vendeve që ata njohin apo rekomandojnë, ndërsa itinerare të tjera ndërtohen rreth historive, natyrës dhe karakteristikave që tradita e feng shui-t ua atribuon vendeve të caktuara. Kjo e kthen destinacionin në një histori që duhet ndjekur dhe jo vetëm në një pikë që duhet fotografuar.
Strategjia zgjidh edhe një problem real të turizmit modern. Kur një vend bëhet globalisht popullor, turistët kanë tendencën të grumbullohen në të njëjtat lagje, restorante dhe atraksione që kanë parë në TikTok ose Instagram. Qytetet e vogla mund të ndodhen vetëm disa orë larg dhe të kenë histori, ushqim dhe natyrë interesante, por pa një narrativë të fortë është shumë më e vështirë të konkurrojnë për vëmendje.
Koreja ka një avantazh të veçantë këtu: kultura e saj pop tashmë ka audiencë globale. K-pop-i, serialet koreane, gastronomia dhe beauty kanë krijuar një publik që nuk kërkon vetëm të shohë monumente, por dëshiron të hyjë më thellë në mënyrën e jetesës së vendit. Duke e përdorur këtë interes për të promovuar rajone më pak të njohura, turizmi mund të shpërndahet përtej destinacioneve që tashmë janë të mbushura. Turisti i ri nuk kërkon domosdoshmërisht vendin më të famshëm. Kërkon historinë më interesante për të treguar pasi të kthehet, dhe Korea duket se po ndërton destinacione pikërisht mbi këtë ide.
