Projektligji i ri krijon hapësirën e posaçme ligjore për emetimin e obligacioneve të mbuluara

Ministria e Financave ka hedhur për konsultim publik projektligjin “Për emetimin e obligacioneve të mbuluara dhe mbikëqyrjen e tyre”.

Projektligji, i hartuar nga Autoriteti i Mbikëqyrjes Financiare (AMF), synon krijimin e një regjimi të posaçëm, të plotë dhe të harmonizuar për emetimin, funksionimin, administrimin dhe mbikëqyrjen publike të obligacioneve të mbuluara.

Ky instrument është një titull borxhi i emetuar nga një institucion krediti dhe i siguruar me një grup të veçuar aktivesh me cilësi të lartë, mbi të cilat investitorët kanë të drejtë përparësie, krahas pretendimit të drejtpërdrejtë ndaj institucionit të kreditit emetues.

Sipas relacionit, projektligji krijon bazën juridike për përdorimin e obligacioneve të mbuluara si instrument financimi afatgjatë nga institucionet e kreditit, duke garantuar që emetimi të mbështetet në aktive të pranueshme, të identifikueshme, të vlerësuara dhe të veçuara nga aktivet e tjera të emetuesit.

Ai vendos një sistem të integruar mbrojtjeje, i cili përfshin mbrojtjen e dyfishtë të investitorëve, veçimin e grupit të mbulimit nga masa e likuidimit, ndalimin e përshpejtimit automatik të pagesave, kërkesat për mbulim dhe mbikolateralizim, rezervën e likuiditetit, monitorimin e pavarur të grupit të mbulimit dhe mbikëqyrjen publike të programit.

Projektligji rregullon në mënyrë të strukturuar kushtet për emetimin dhe miratimin e programeve të obligacioneve të mbuluara nga institucionet e kreditit të themeluara në Republikën e Shqipërisë; karakteristikat strukturore të obligacioneve të mbuluara, përfshirë mbrojtjen e dyfishtë, veçimin nga procedura e falimentit, aktivet e pranueshme, përbërjen e grupit të mbulimit, kontratat derivative dhe financimin e përbashkët; kërkesat sasiore dhe cilësore për mbulimin e detyrimeve, mbikolateralizimin minimal, përputhjen e flukseve monetare, rezervën 180-ditore të likuiditetit dhe zgjatjen e maturimit; regjistrin e grupit të mbulimit, monitoruesin e pavarur, administrimin e rreziqeve, provat e rezistencës dhe informacionin periodik për investitorët; kompetencat e Autoritetit të Mbikëqyrjes Financiare dhe të Bankës së Shqipërisë për miratimin, mbikëqyrjen, raportimin, kontrollin dhe marrjen e masave; rregullat e posaçme për vazhdimësinë e programit në rast paaftësie paguese, ndërhyrjeje të jashtëzakonshme ose likuidimi të detyruar të emetuesit, përfshirë caktimin dhe detyrat e administratorit të posaçëm; masat mbikëqyrëse, sanksionet administrative, publikimin e vendimeve dhe përdorimin e emërtimeve “obligacion i mbuluar”, “obligacion evropian i mbuluar” dhe “obligacion evropian i mbuluar (Premium)”./Monitor