Prokuroria e Sarandës ka kërkuar sekuestrimin e hotelit “Central Park Premium Hotel” në Ksamil, i cili sipas hetimeve është ndërtuar me pesë kate pa leje.
Në kuadër të të njëjtit hetim është sekuestruar edhe një objekt pranë hotelit, me një kat dhe sipërfaqe 52.2 metra katrorë, i dyshuar gjithashtu si i ndërtuar pa leje.
Gjykata ka caktuar masën e sigurisë “Arrest në shtëpi” për shtetasin me inicialet K.P.
Prokuroria bën me dije se hetimet vijojnë për të identifikuar dhe përcaktuar përgjegjësinë e të gjithë personave që dyshohet se janë përfshirë në rast.
Njoftimi:
Prokuroria Sarandë sekuestron ‘Central Park Premium Hotel’ dhe një ndërtim tjetër pa leje në Ksamil, hetime për ‘ndërtim të paligjshëm’ e ‘shpërdorim detyre’
Me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm, Sarandë, u sekuestrua hoteli ‘Central Park Premium Hotel’ me pesë kate pa leje në Ksamil si dhe një objekt pranë tij, me një kat pa leje me 52.2 m2 po në Ksamil.
Ndërkohë u caktua masa e sigurimit ‘Arrest në shtëpi’ për shtetasin K.P.
Këto masa u kërkuan nga Prokuroria pranë Gjykatës së Shkallës së Parë të Juridiksionit të Përgjithshëm Sarandë në kuadër të hetimeve mbi procedimin penal nr.522/2025 për veprën penale të “Ndërtim i paligjshëm” parashikuar nga neni 199/a-4 i Kodit Penal dhe “Shpërdorimi i detyrës” parashikuar nga neni 248 i Kodit Penal.
Prokuroria pranë Gjykatës së Shkallës së Parë të Juridiksionit të Përgjithshëm Sarandë po vijon me kryerjen e veprimeve hetimore për identifikimin dhe individualizimin e përgjegjësisë për të gjithë shtetasit e përfshirë në këtë ngjarje.
