Kriza në FIFA po merr përmasa të reja, ndërsa përplasja mes drejtuesve të futbollit botëror dhe Gianni Infantinos është zhvendosur tashmë edhe brenda strukturave të organizatës.
Presidenti i Federatës Gjermane të Futbollit, Bernd Neuendorf, ka kritikuar hapur iniciativën e fundit të Infantinos për reforma në FIFA.
Neuendorf, i cili është edhe anëtar i Këshillit të FIFA-s, e ka cilësuar letrën e presidentit si një “manovër të qartë” për të siguruar rizgjedhjen vitin e ardhshëm.
Infantino u dërgoi këtë javë një mesazh të 211 federatave anëtare, duke propozuar një rishikim të pavarur të procesit të vendimmarrjes dhe konsultime për mënyrën e qeverisjes së FIFA-s.
Por Neuendorf argumenton se presidenti aktual nuk është personi i duhur për të udhëhequr një proces të tillë, duke deklaruar se ai ka humbur besueshmërinë.
Tensionet u përshkallëzuan pas planit të braktisur për shitjen e një pjese prej 20% të të drejtave komerciale të FIFA-s, përfshirë ato të Kupës së Botës, te investitorë privatë.
Propozimi u tërhoq në korrik pas kundërshtimeve të forta dhe kërcënimeve për bojkot, ndërsa UEFA, AFC dhe CONCACAF kërkuan ndryshime në mënyrën e drejtimit të FIFA-s.
Edhe Federata Holandeze ka shprehur skepticizëm, duke thënë se propozimet e reja nuk kanë rikthyer besimin.
Ndërkohë, zgjedhjet presidenciale të FIFA-s janë planifikuar për marsin e vitit 2027 në Rabat, ku Infantino synon një tjetër mandat.
Sipas burimeve të cituara nga Reuters, kundërshtarët e tij po hasin vështirësi për të gjetur një kandidat të fortë, ndërsa diskutimet po përqendrohen edhe te kufizimi i kompetencave presidenciale.
UEFA, megjithatë, ka deklaruar se po punon për të gjetur një kandidat të besueshëm dhe për një program më të gjerë reformash në qeverisjen e futbollit botëror.
Përplasja e fundit mes Neuendorf dhe Infantinos tregon se debati për të ardhmen e FIFA-s tashmë po zhvillohet në nivelet më të larta të organizatës.
Dhe ndërsa afrohet votimi i vitit 2027, beteja për mënyrën se si do të drejtohet futbolli botëror pritet të bëhet edhe më e fortë.
