Deputeti i Partisë Mundësia, Erald Kapri ka kërkuar sot në mbledhjen e komisionit parlamentar, që kryeministri Edi Rama të kthehet me urgjencë nga Amerika dhe të paraqesë dorëheqjen, në mënyrë që vendi të shkojë menjëherë në zgjedhje të parakohshme.
Deklarata e tij vjen pas zhvillimeve të sotme nga Prokuroria e Posaçme, ku u njoftuar urdhër arresti për shefen e Shërbimit Informativ të Shtetit, Vlora Hyseni, pasi dyshohet se i ka treguar Ergys Agasit sekrete shtetërore dhe e ka ndihmuar t'i shpëtonte arrestimit, kur ishte në arrati.
"Kryeministri i Shqipërisë të ndërpresë menjëherë vizitën në OKB, të vijë menjëherë këtu, të japë dorëheqjen dhe të përgatitet vendi për të shkuar në zgjedhje", u shpreh Erald Kapri.
Deputeti i Partisë Mundësia ka theksuar se sot të gjithë shqiptarët janë të turpëruar me atë që ka zbuluar SPAK, duke deklaruar se shteti ka rënë, sepse nuk ndodh as në vendet e treta që kreu i shërbimeve sekrete të jetë pjesë e rrjeteve kriminale.
"Sot na keni turpëruar si vend, na keni turpëruar si shqiptarë vetëm për të mbrojtur fatin e Edi Ramës. Sot, shteti ka rënë, siguria kombëtare është kompromentuar si asnjëherë më përpara. Nuk ka ndodhur në rruzullin tokësor që kreu i shërbimeve sekrete të jetë pjesë e një strukture kriminale të trafikut të drogës.
Po çfarë duhet të ndodhi më në këtë vend?! Nuk mund të çedojë kreu i Shërbimeve sekrete. Në momentin që kreu i shërbimeve sekrete shet informacion dhe ia shet krimit të organizuar, nuk ka më shtet", përmbylli Erald Kapri.
Sondazh
Lexo gjithashtu
