Është ndarë nga jeta Prof. Asoc. Dr. Sulejman Budo, mjeku endokrinolog që i kushtoi më shumë se pesë dekada të jetës mjekësisë shqiptare.
Lajmi është bërë i ditur nga Shoqata e Diabetit në Shqipëri, e cila ka vlerësuar kontributin e tij të rëndësishëm në endokrinologji, diabetologji dhe zhvillimin e mjekësisë nukleare në vend.
Dr. Budo ishte një prej themeluesve dhe figurave aktive të Shoqatës së Diabetit në Shqipëri. Për vite me radhë ai kontribuoi në mjekimin, ndjekjen dhe edukimin e pacientëve diabetikë, duke u angazhuar për menaxhimin sa më të mirë të diabetit.
Krahas punës si mjek, ai ishte pedagog, autor dhe edukues.
Një tjetër pjesë e veprimtarisë së tij ishte puna si kryeredaktor i revistës “Për ju diabetikë”, përmes së cilës përcillej informacion dhe këshillim për pacientët me diabet.
