Shqipëria po fiton gjithnjë e më shumë hapësirë në tregun e pushimeve të përballueshme në Mesdhe, falë kombinimit të plazheve, klimës së ngrohtë, kuzhinës mesdhetare dhe çmimeve konkurruese, shkruan media franceze “Ouest France”.
Për turistët që kërkojnë një javë pushime ku akomodimi, ushqimet dhe shërbimet kryesore përfshihen në një paketë të vetme, vendi po shfaqet si një alternativë interesante kundrejt destinacioneve më të njohura të rajonit.
Në një artikull për pushimet me kosto të ulët, Shqipëria renditet mes destinacioneve të përzgjedhura për qëndrime “all inclusive”, krahas vendeve dhe zonave turistike si Tunizia, Greqia, Ishujt Kanarie, Bodrumi, Egjipti dhe Majorka.
Artikulli e përshkruan Shqipërinë si surprizën mesdhetare të pushimeve “all inclusive”, duke vënë në dukje se vendi është i përshtatshëm për vizitorët që duan të kombinojnë plazhin, ushqimin tradicional dhe një buxhet të kontrolluar.
Sipas artikullit, Shqipëria po shfaqet gradualisht si një alternativë në rritje në tregun e pushimeve “all inclusive”, ndërsa disa zona bregdetare vazhdojnë të ofrojnë çmime konkurruese në krahasim me destinacione të tjera mesdhetare.
Durrësi, një nga qendrat kryesore turistike bregdetare të Shqipërisë, përmendet si shembull konkret.
Sipas ofertave të publikuara, një javë qëndrimi “all inclusive” në hotelet e Durrësit mund të nisë nga 295 euro për person.
Kjo paketë mund t’u përshtatet veçanërisht turistëve që kërkojnë të planifikojnë paraprakisht shpenzimet e pushimeve, pasi një formulë “all inclusive” zakonisht përfshin akomodimin, ushqimet, pijet dhe disa aktivitete, ndërsa në varësi të ofertës mund të përfshihen edhe fluturimet dhe transferimi nga aeroporti në hotel.
Përsa i përket periudhës së udhëtimit, artikulli rekomandon muajt nga qershori deri në shtator, kur kushtet janë më të përshtatshme për pushime në bregdet dhe temperaturat e deteve Adriatik dhe Jon janë të favorshme për turistët.
Në këtë mënyrë, Shqipëria paraqitet si një destinacion ku turistët mund të kombinojnë pushimet në plazh, kuzhinën mesdhetare dhe një paketë të paracaktuar shpenzimesh, duke e bërë atë një alternativë ideale, për turistët që kërkojnë pushime verore me një buxhet jo shumë të lartë.