Presidenti amerikan Donald Trump deklaroi gjatë fjalimit të tij në Asamblenë e Përgjithshme të Kombeve të Bashkuara se Shtetet e Bashkuara po punojnë ngushtë me udhëheqësit e Rusisë dhe Ukrainës për arritjen e një marrëveshjeje që do t’i japë fund luftës.

“Ne po punojmë ngushtë me udhëheqësit e Rusisë dhe Ukrainës dhe do ta arrijmë këtë, më shpejt nga sa e kuptojnë njerëzit”, tha Trump gjatë fjalimit në OKB.

Duke folur për Iranin, presidenti amerikan tha se ndodhet përballë një “vendimi të madh” lidhur me të ardhmen e konfliktit dhe mundësinë e arritjes së një marrëveshjeje me Teheranin.

Trump tha se një marrëveshje do t’i mundësonte Iranit të rindërtonte vendin dhe të zhvillohej në një nivel edhe më të madh se më parë. Në të kundërt, ai paralajmëroi se SHBA-të mund të ndërmarrin një tjetër kurs veprimi ndaj Republikës Islamike.

“Kam një vendim të madh për të marrë. A do të arrihet një marrëveshje me Iranin që do t’i lejojë atij të rindërtohet dhe të krijojë një vend shumë më të madh se sa ka qenë ndonjëherë? Apo ta shkatërroj Republikën Islamike dhe ta bëj shpejt, duke mos u dhënë më mundësinë të vrasin dhe të shkatërrojnë njerëz dhe vende?”, u shpreh Trump.

Presidenti amerikan tha gjithashtu se beson se një marrëveshje me Iranin mund të arrihet pas zgjedhjeve të nëntorit në SHBA, duke pretenduar se Teherani po pret të shohë rezultatin politik të administratës së tij.

“Unë besoj se do të bëjmë një marrëveshje menjëherë pas zgjedhjeve, sepse nuk ka kuptim që ata të mos e bëjnë”, tha Trump gjatë fjalimit në OKB.

Fjalimi i Trump u përqendrua në konfliktet kryesore ndërkombëtare, ndërsa lufta në Iran dhe përpjekjet për t’i dhënë fund luftës Rusi-Ukrainë mbetën ndër çështjet kryesore të adresuara prej tij.