Gjykata e Apelit në Teheran ka rrëzuar dënimin me katër vjet burg ndaj këngëtares iraniane Hiwa Sefizadeh, e cila ishte dënuar pas një koncerti ku këndoi publikisht në kryeqytetin iranian.
Sipas faqes së lajmeve “Avash”, gjykata e shpalli Sefizadeh të pafajshme për akuzat për “nxitje të korrupsionit dhe prostitucionit”. Në vend të dënimit me burg, ajo është dënuar me një gjobë prej pak më shumë se 200 dollarësh dhe tre muaj punë në shërbim të komunitetit, për “shkelje të moralit publik”.
Këngëtarja kishte bërë publike muajin e kaluar masën fillestare të dënimit, e cila lidhej me një koncert të zhvilluar në shkurt të vitit 2025. Sefizadeh kishte performuar së bashku me një grup që interpretonte muzikë tradicionale persiane, por koncerti ishte ndërprerë nga forcat e sigurisë.
Në Iran, gratë përgjithësisht nuk lejohen të këndojnë solo në koncerte publike, një kufizim që ka sjellë ndër vite debate dhe reagime të shumta në vend.
Pas vendimit të Apelit, Sefizadeh publikoi në Instagram një mesazh të avokatit të saj, i cili konfirmonte ndryshimin e dënimit. “Shpresojmë për ditën kur asnjë zë të mos heshtet më”, shkroi këngëtarja.
Dënimi fillestar me katër vjet burg kishte shkaktuar reagime të shumta kritike në Iran, ndërsa Sefizadeh mori mbështetje edhe nga figura të njohura të sektorit të kulturës.
“Ne kemi shumë këngëtare të mira dhe janë krijuar shumë vepra të vlefshme”, kishte deklaruar në atë kohë Hamid Reza Noorbakhsh, drejtues i shoqatës së artistëve “House of Music”.
Sipas Noorbakhsh, në Iran nuk ekziston një rregull fetar dhe ligjor që ndalon në mënyrë absolute dhe pa përjashtim gratë të këndojnë.