Me masë arresti nga SPAK/ Merren në pyetje Vlora Hyseni dhe dy të tjerë, nesër seanca në GJKKO

Gjykata e Posaçme ka bërë me dije përmes një njoftimi për mediat se ditën e nëserme do të mbahet seanca e marrjes në pyetje për ish-drejtoreshën e SHISH-it, Vlora Hyseni, si dhe dy persona të tjerë nën hetim, Fatjon Kalluçi dhe Embro Sulejmani.

Seanca për marrjen në pyetje të Kalluçit dhe Sulejmanit do të mbahet nesër në orën 09:00, ndërsa për Vlora Hysenin seanca do të mbahet në orën 12:00.

SPAK ka caktuar masën e sigurisë “arrestë në shtëpi” për Vlora Hysenin dhe masën “arrest në burg” për Fatjon Kalluçin dhe Embro Sulejmanin.

Njoftimi i plotë:

GJYKATA E POSAÇME E SHKALLËS SË PARË PËR KORRUPSIONIN DHE KRIMIN E ORGANIZUAR

Nisur nga interesi i lartë që ka në publik dhe në media procedimi penal nr. 20/1, i vitit 2025, në ngarkim të personave nën hetim: Vlora Hyseni, e dyshuar për kryerjen e veprave penale të parashikuara nga nenet 302/2 dhe 295/a/1, të Kodit Penal; Fatjon Kalluçi, i dyshuar për kryerjen e veprës penale të parashikuar nga neni 295/a/1, i Kodit Penal dhe Embro Sulejmani, i dyshuar për kryerjen e veprës penale të parashikuar nga neni 302/2, i Kodit Penal, ju njoftojmë se:

Më datë 23.09.2026 Prokuroria e Posaçme kundër Korrupsionit dhe Krimit të Organizuar ka paraqitur pranë gjykatës kërkesat për marrjen në pyetje të personave nën hetim: Vlora Hyseni, ndaj së cilës është caktuar masa e sigurimit "arrest në shtëpi" dhe Fatjon Kalluçi dhe Embro Sulejmani, ndaj të cilëve është caktuar masa e sigurimit "arrest në burg".

Seanca për marrjen në pyetje të personave nën hetim Fatjon Kalluçi dhe Embro Sulejmani është caktuar me datë 24.09.2026, ora 09:00, ndërsa për personin nën hetim Vlora Hyseni është caktuar me datë 24.09.2026, ora 12:00.

Kujtojmë se mbrëmjen e djeshme, Vlora Hyseni u vetëdorëzua në policinë e Kosovës dhe u shoqërua më pas drejt Shqipërisë.

Hyseni akuzohet për kryerjen e veprave penale "përkrahje të autorit të krimit" dhe "nxjerrjen e të dhënave sekrete". Një ditë më parë kreu i qeverisë Edi Rama njoftoi lirimin e saj nga detyra si drejtoreshë e Shërbimit Informativ të Shtetit.

Ndërkohë po ditën e djeshme në kuadër të hetimeve për Ergys Agasin, janë kryer kontrolle edhe në shtëpitë e ish-drejtorit të shtetit të shtetit, Ilir Prodës.  Ky i fundit u mor në pyetje po ditën e djeshme nga Prokuroria e Posaçme. /CNA