Një banor i fshatit Milec, Njësia Administrative Mollas, Bashkia Ersekë, i është drejtuar redaksisë së JOQ Albania për të denoncuar aktivitetin e një firme private që merret me nxjerrjen e qymyrgurit.
Sipas banorit, firma ka leje shfrytëzimi për tokë shtetërore, por pretendon se gjatë gërmimeve ka ndërhyrë edhe në prona private të banorëve të fshatit, të ndara sipas Ligjit 7501 dhe për të cilat banorët paguajnë taksat.
Në pamjet e dërguara në redaksi shihen gërmime të thella në terren, eskavatorë dhe kamionë që transportojnë materialin e nxjerrë nga zona.
Banori pretendon se gërmimet kanë dëmtuar gjithashtu rrugën e fshatit dhe lumin, ndërsa sipas tij, rrëshqitjet e tokës kanë nisur të afrohen drejt banesave.
“Firma ka shkatërruar prona private të fshatarëve, ku po rrezikohen banesat e fshatit. Kanë filluar dhe plasaritje në banesa.”
Ai thotë se banorët janë ankuar prej tre vitesh në Bashkinë Ersekë dhe në Komisariatin e Ersekës. Sipas tij, nga komisariati kanë marrë mbështetje brenda kompetencave të tyre, ndërsa pretendon se bashkia nuk ka marrë masa për ndalimin e aktivitetit.
“Bashkia e Ersekës, që kërkon taksat e tokës dhe jemi pagues të rregullt, nuk merr asnjë masë për ndalimin e tyre.”
Në një tjetër pjesë të videos, banorët shihen pranë zonës së gërmimeve, ndërsa i kërkojnë drejtuesit të mjetit të ndalojë punën.
Pretendimet për kufijtë e lejes së shfrytëzimit, dëmtimin e pronave private, devijimin e lumit dhe rrezikun për banesat kërkojnë verifikim nga institucionet përgjegjëse dhe dokumentacionin përkatës.
Banorët kërkojnë ndërhyrje për të verifikuar aktivitetin e firmës dhe ndikimin e gërmimeve në pronat, rrugën dhe terrenin përreth.
JOQ Albania publikon pamjet dhe denoncimin e banorit, ndërsa mbetet e hapur për reagimin e Bashkisë Ersekë, institucioneve përgjegjëse dhe subjektit që ushtron aktivitetin në zonë.
