Në një bisedë të hapur në emisionin “Live from Tirana”, somelieri Fation Tila ka treguar rrugëtimin e tij drejt botës së verës, një pasion që sipas tij nuk ka pasur një moment të vetëm fillestar, por është zhvilluar si një udhëtim i gjatë.
Tila tregon se gjatë viteve që ka jetuar në Verona, Itali, ka qenë i rrethuar nga zona vreshtare, veçanërisht në Pedemonte, një fshat i Valpolicelas ku prodhohet Amarone. Ky kontakt i vazhdueshëm me kantina dhe kulturën e verës e bëri të kuriozitetin e tij të shndërrohej gradualisht në pasion profesional.
“Nuk ka qenë një person në veçanti, por kanë qenë pozicioni gjeografik ku unë kam jetuar”, – thotë Tila, duke shpjeguar se fillimisht punonte si baristë dhe provonte vera në kohën e lirë, ndërkohë që merrte pjesë në panaire dhe degustime.
Ai thekson se vitet e para të kësaj rruge kanë qenë të mbushura me studim intensiv – biblioteka deri vonë natën dhe seminare të vazhdueshme – për të kuptuar thellësisht atë që dëshironte të bënte pjesë të jetës së tij profesionale.
Sipas somelierit, vera nuk është thjesht një produkt final në gotë, por një histori e tërë që përfshin traditë, sakrificë dhe punë të palodhur të njerëzve që punojnë tokën, të varur nga kushtet klimatike që mund të ndryshojnë çdo vit prodhimin.
