Detaje të reja dalin nga hetimi i SPAK për Ergys Agasin, teksa në fokus të zhvillimeve të fundit është përmendur edhe emri i Neritan Nallbatit, ish-drejtorit të Departamentit të Policisë Kriminale në Policinë e Shtetit. Gazetari i TV Klan Merin Maçi, ka deklaruar se një tjetër drejtues i lartë i Policisë dyshohet se mund të ketë pasur lidhje me Ergys Agasin dhe se po verifikohet mundësia që këtij të fundit t’i jenë dhënë informacione policore, si përpara shpalljes së tij në kërkim, ashtu edhe gjatë periudhës kur ai ishte në kërkim.
Sipas deklarimit, bëhet fjalë për Neritan Nallbatin, i cili ka drejtuar sektorin e Policisë Kriminale dhe ka qenë në detyrë deri në muajin korrik. Dyshimet e raportuara lidhen me mundësinë që ai të ketë pasur komunikime ose kontakte me Agasin dhe që informacionet e brendshme të Policisë të kenë ndikuar në lëvizjet e tij gjatë kohës që ishte në kërkim.
Në të njëjtën kohë, SPAK ka ndërmarrë një tjetër veprim në kuadër të dosjes së Ergys Agasit. Mëngjesin e 22 shtatorit, agjentë të BKH-së kanë kontrolluar banesën e ish-drejtorit të Përgjithshëm të Policisë së Shtetit, Ilir Proda. Kontrolli është kryer me urdhër të GJKKO-së, ndërsa më pas Proda është paraqitur në SPAK, ku është marrë në pyetje.
Trondit gazetari: Edhe Neritan Nallbati dyshohet se i shërbente Ergys Agasit
Sipas raportimeve, gjatë kontrollit në banesën e Prodës janë sekuestruar telefoni i tij, një laptop, si dhe pajisje të tjera elektronike. Hetimi dyshohet se lidhet me komunikimet e zbuluara pas arrestimit të Ergys Agasit dhe Uljan Shpatarakut.
Emri i Prodës është futur në këtë fazë të hetimit pasi prokurorët po verifikojnë komunikimet dhe kontaktet e personave që dyshohet se kanë pasur lidhje me Agasin. Ndërkohë, SPAK ka ndërmarrë masa edhe ndaj zyrtarëve të tjerë, përfshirë drejtuesen e SHISH, Vlora Hyseni, ndaj së cilës është caktuar masa e “arrestit në shtëpi” dhe pezullimi nga detyra, sipas raportimeve të publikuara.
Hetimi vijon dhe pritet që këqyrja e materialeve të sekuestruara dhe komunikimeve telefonike të nxjerrë në dritë nëse persona të tjerë në strukturat e Policisë apo institucione të tjera kanë pasur kontakte me Ergys Agasin ose i kanë përcjellë informacione gjatë periudhës kur ai ndodhej në kërkim.
http://Infonews.al
