Në ditën e 116-të të protestës kundër qeverisë dhe kryeministrit Edi Rama, profesori Lush Susaj u ka bërë thirrje qytetarëve, studentëve, nxënësve dhe forcave politike që t’i bashkohen protestës.
Duke folur para protestuesve, profesori Susaj kritikoi qytetarët që qëndrojnë pasivë ndërsa vendi përballet me probleme të shumta.
Sipas Susajt, qëndrimi pasiv i qytetarëve është një pengesë për reagimin qytetar ndaj zhvillimeve në vend. Ai tha se të gjithë duhet të dalin dhe të përmbyset sistemi autokratik.
“Për ata që bëjnë sehir dhe karshillëk me injorancën e tyre duke qëndruar në kafe, i bëj thirrje hajdeni o vëllezër e motra në shesh, sepse qëndrimi juaj është kundër qytetarësi, është pozicion mjerani.
Më gjeni një vend tjetër në bota ku qytetari dalldiset në kafe dhe raki dhe shteti shkërmoqet para syve. Shqipëria është tredhur nën frikë dhe terror, unë ju bëj thirrje, largojeni frikën dhe terrorin. Nuk vdes njeri për bukë. Dilni në sheshin e lirisë.
Së dyti Ju bëj thirrje nxënësve dhe studenteve, ju lutem dilni në sheshin e lirisë për veten tuaj. Çlirohuni dhe dilni në sheshin e lirisë.
Së treti i bëj thirrje forcave politike, ata që nuk e kanë lyer fytyrën në korrupsion, dilni në sheshet e lirisë dhe përbuzni sistemin autokratik të partive që masakruan Shqipërinë. Po na shembet çatia mbi kokë, po na digjet shtëpia ku jemi aksionërë të përbashkët”, tha nder të tjerë Susaj.
