Për të tetën natë radhazi, Prishtina është bërë skenë e protestave kundër vendimit të Dhomave të Specializuara të Kosovës në Hagë ndaj katër ish-drejtuesve të UÇK-së.
Mijëra qytetarë u mblodhën në sheshin “Skënderbeu”, duke shprehur kundërshtimin ndaj dënimeve të dhëna për Hashim Thaçin, Kadri Veselin, Jakup Krasniqin dhe Rexhep Selimin.
“Jo në emrin tim” dhe “Liria ka emër” ishin disa prej mesazheve të vendosura në pankarta, ndërsa në shesh u valëvitën flamujt kombëtarë dhe ata të UÇK-së.
Protestuesit kërkuan gjithashtu që institucionet e Kosovës të ndërmarrin hapa në mbështetje të ish-krerëve të UÇK-së dhe mbrojtjes së tyre ligjore.
Një prej organizatorëve, Çlirim Haziri, i bëri thirrje institucioneve që të mos vonojnë më tej në trajtimin e kërkesave të protestuesve. Mes tyre është edhe kërkesa për shqyrtimin dhe votimin e projektligjit për ndryshimin dhe plotësimin e Ligjit për Dhomat e Specializuara, si dhe sigurimin e fondeve për mbrojtjen e të dënuarve.
“Mosveprimi i institucioneve nuk mund të zgjasë pafund. Sepse ne nuk e durojmë padrejtësinë. Populli nuk e duron heshtjen”, deklaroi Haziri, duke kërkuar veprim të shpejtë nga institucionet e Kosovës.
Protestat janë shtrirë edhe jashtë Kosovës, me tubime të raportuara në vende të ndryshme ku jeton diaspora kosovare, përfshirë SHBA-në, Kanadanë, Zvicrën, Gjermaninë dhe Austrinë.
Më 16 shtator 2026, Dhomat e Specializuara të Kosovës shpallën vendimin e shkallës së parë për çështjen Thaçi dhe të bashkëpandehurit.
Hashim Thaçi dhe Jakup Krasniqi u dënuan me nga 25 vjet burgim, Kadri Veseli me 18 vjet, ndërsa Rexhep Selimi me 13 vjet. Trupi gjykues i shpalli fajtorë për disa krime lufte, përfshirë ndalimin arbitrar, trajtimin mizor, torturën dhe vrasjen.
Në të njëjtin vendim, katër të akuzuarit u shpallën të pafajshëm për akuzat për krime kundër njerëzimit. Vendimi është i shkallës së parë dhe mund të apelohet.
Gjykata ka theksuar se çështja lidhet me përgjegjësinë individuale të të akuzuarve dhe jo me legjitimitetin e UÇK-së apo luftën për pavarësinë e Kosovës.
