Mercedes paralajmëron mbylljen e dy fabrikave në Gjermani

Mercedes-Benz ka paralajmëruar se mund të mbyllë dy fabrika në Gjermani, nëse nuk arrihet ulja e kostove të prodhimit. Kompania thotë se kostot e larta të punës e kanë bërë prodhimin në Gjermani më pak konkurrues në tregun ndërkombëtar.

Paralajmërimi u bë nga drejtuesi i prodhimit të Mercedes-Benz, Michael Schiebe, gjatë një takimi me punonjësit në fabrikën e Sindelfingen.

Sipas kompanisë, nëse nuk merren masa për uljen e kostove, mund të mbyllet një fabrikë montimi dhe një fabrikë motorësh. Mercedes nuk ka bërë të ditur se cilat objekte mund të preken nga një vendim i tillë.

Kompania thekson se objektivi i saj është të ruajë të gjitha fabrikat dhe vendet e punës në Gjermani. Megjithatë, drejtuesit kërkojnë rritje të produktivitetit dhe ndryshime që do të ulnin kostot e prodhimit.

Punonjësit dhe përfaqësuesit e tyre kanë kundërshtuar paralajmërimin. Këshilli i përgjithshëm i punës së Mercedes-Benz tha se kërcënimet për mbylljen e fabrikave nuk janë mënyra për të zgjidhur problemet dhe paralajmëroi rezistencë ndaj çdo presioni mbi punonjësit.

Kriza vjen në një periudhë të vështirë për industrinë gjermane të automobilave. Prodhuesit europianë po përballen me konkurrencë në rritje nga rivalët kinezë, ndërsa kostot e larta të prodhimit dhe tarifat amerikane po shtojnë presionin mbi kompanitë.

Ndërkohë, sindikata IG Metall ka zhvilluar protesta në të gjithë Gjermaninë kundër shkurtimeve të vendeve të punës në sektorin e automobilave.

Mercedes-Benz nuk ka përcaktuar ende se cilat fabrika mund të jenë në rrezik, ndërsa negociatat për uljen e kostove dhe të ardhmen e prodhimit në Gjermani pritet të vazhdojnë./ CNA