Një tubacion kryesor i ujit të pijshëm ka shpërthyer në rrugën “Hysen Kukaleshi”, në zonën“5 Majit” në Tiranë, duke shkaktuar përhapjen e ujit në rrugë dhe vështirësi për banorët e zonës.
Një qytetar i është drejtuar redaksisë së JOQ Albania, duke kërkuar publikimin e pamjeve dhe ndërhyrjen e institucioneve përgjegjëse.
Ai ka treguar se që prej orës 07:00 të mëngjesit dhe deri tani që ora ka kaluar 15:00 situata vijon të mbetet e njëjtë.
“Kam që në orën 7 të mëngjesit e deri tani që po përballemi me një plasja tubacioni të ujit të pijshëm, tub kryesor. Kam njoftuar UKT-në dhe nuk po na japin zgjidhje”, shprehet qytetari.
Ai tregon se rrjedhja e ujit ka krijuar probleme serioze në lëvizjen e banorëve, të cilët sipas tij kanë mbetur të bllokuar në banesat e tyre.
“Kanë ngelur pa dalë nga shtëpia”, shkruan qytetari, duke shtuar se edhe fëmijët e zonës, të cilët duhet të shkojnë në shkollë, e kanë të vështirë të kalojnë nëpër rrugë.
Banorët kërkojnë ndërhyrje të menjëhershme për riparimin e tubacionit dhe pastrimin e rrugës, ndërsa apelojnë që problemi të mos lihet pa zgjidhje, për shkak të vështirësive që po u shkakton në përditshmëri.
