Kremlini: Ende asnjë vendim për një takim të mundshëm të Putin me Trump në dhjetor

Kremlini ka bërë me dije se nuk është marrë ende asnjë vendim për një samit të mundshëm në dhjetor midis presidentëve rusë dhe amerikanë, Vladimir Putin dhe Donald Trump. Sipas Kremlinit është shumë herët për të folur për axhendën e një takimi të tillë.

Sekretari i Shtetit i SHBA-së , Marco Rubio njoftoi të mërkurën se Shtetet e Bashkuara e kanë ftuar Putin në një takim të G20 në Miami, në dhjetor, ku ai mund të zhvillojë një samit me Trump.

I pyetur se çfarë mund të diskutojnë dy presidentët, zëdhënësi i Kremlinit, Dmitry Peskov, u tha gazetarëve: “Është e parakohshme të flasim për këtë në këtë kohë. Ende nuk është marrë asnjë vendim. Sigurisht, ne e vlerësojmë këtë lloj ftese, e njohim vlerën e saj dhe do të shqyrtohet dhe koordinohet, pas së cilës do të merret vendimi i duhur.”

Trump është përpjekur të ndërmjetësojë përfundimin e luftës në Ukrainë që kur u kthye në Shtëpinë e Bardhë në janar të vitit të kaluar, por pa sukses. Peskov përsëriti qëndrimin e Rusisë se kërkon një zgjidhje paqësore, jo një armëpushim të përkohshëm.

Kremlini tha gjithashtu se e konsideron të paligjshëm dhe një formë vjedhjeje vendimin e Bashkimit Evropian për të transferuar të ardhurat nga asetet e ngrira ruse në Ukrainë. Në gusht, Komisioni njoftoi se BE do t’i jepte Kievit 1.4 miliardë euro në interesa për depozitat, disa prej të cilave janë asete të bankës qendrore ruse që janë ngrirë nga BE për shkak të luftës në Ukrainë.