“Jemi duke e ndjekur situatën”/ Ambasadori italian flet për protestat dhe skandalin e Vlora Hysenit

Ambasadori i Italisë në vendin tonë, Marco Alberti, në një deklaratë për mediat nga Korça, është shprehur se po i ndjekin me vëmendje protestat dhe se respekton se çfarë po ndodh.

"Ne i ndjekim me vëmendje protestat. Sigurisht që nuk i përket, nuk është detyrë e një ambasadori që përfaqëson një shtet të caktuar, të shprehet apo të prononcohet për këtë. Ne jemi duke e ndjekur situatën dhe respektojmë çfarë ndodh", u shpreh Alberti.

I pyetur për skandalin e ish-drejtoreshës së SHISH, Vlora Hysenit, ambasadori nuk pranoi të japë asnjë deklaratë për çështjen. Alberti tha se ai si ambasador merret dhe trajton çështjen e bashkëpunimit dypalësh.

"Atëherë unë nuk mund t'ju jap asnjë përgjigje lidhur me këtë sepse ne merremi, pra trajtojmë çështjet e bashkëpunimit dypalësh dhe nuk mund të kem asnjë mendim lidhur me këtë çfarë po më pyesni", u shpreh ai.

Ndërkohë lidhur me zhvillimet e fundit në Shqipëri, ambasadori tha se Italia po përpiqet që t'u japë një përmbajtje tjetër marrëdhënieve strategjike me Shqipërinë.

Alberti shtoi se ka investime në Shqipëri, të cilat kapin shifrën e rreth 1 miliard eurove. Ai theksoi se forcimi i marrëdhënieve të dy vendeve në fushën e ekonomisë ndihmon sigurisht edhe në rrugëtimin e Shqipërisë drejt anëtarësimit të saj në Bashkimin Europian.

"Atëherë unë mund të ndalem tek angazhimi i Italisë për ta rritur praninë e saj në Shqipëri dhe faktikisht Italia po përpiqet që t'u japë një përmbajtje tjetër marrëdhënieve strategjike me Shqipërinë. Kemi ndërkohë investime në Shqipëri të cilat kapin shifrën e rreth 1 miliard eurove. Gjithashtu krahas investimeve të tjera do të realizohen ose do të mundësohen 600 apo 700 vende të reja pune. Dhe është e rëndësishme që t'u jepet një përmbajtje tjetër këtyre marrëdhënieve strategjike mes dy vendeve tona sepse ne jemi të mendimit që forcimi i marrëdhënieve në fushën e ekonomisë ndihmon sigurisht edhe në rrugëtimin e Shqipërisë drejt anëtarësimit të saj në Bashkimin Europian. Gjithashtu sektorë të rëndësishëm ku ne jemi të pranishëm është ai i inteligjencës artificiale e në sektorin digjital, në industrinë e mbrojtjes e kështu me radhë. Pra, synimi ynë nëpërmjet pranisë sonë këtu është që këtë të rinj apo fëmijët e sotëm të cilët në të ardhmen do të jenë të rritur të qëndrojnë në Korçë, të japin kontributin e tyre, pra ne të forcojmë marrëdhëniet tona në mënyrë që të ndihmojmë të rinjtë apo popullatën që të punojë dhe jetojë në Shqipëri duke dhënë ndihmesë për rritjen dhe zhvillimin e Shqipërisë", u shpreh ai. /CNA